پرەزيدەنت قاسىم-جومارت توقايەۆ كورنەكتى جازۋشى، مەملەكەتتىك سىيلىقتىڭ يەگەرى، بەلگىلى قوعام قايراتكەرى قابدەش ءجۇمادىلوۆتىڭ دۇنيەدەن وتۋىنە بايلانىستى كوڭىل ايتىپ، جەدەلحات جولدادى. بۇل تۋرالى اقوردا سايت حابارلادى.
"قابدەش ءجۇمادىل ۇلىنىڭ قالامىنان شىققان تۋىندىلار ءداۋىردىڭ جۇگىن، زامانا كەلبەتىن، قوعامنىڭ ءۇنىن ايقىن كورسەتە بىلگەن ەدى. سونىڭ ىشىندە قيلى كەزەڭدى باستان كەشكەن حالىقتىڭ تاعدىرىن ارقاۋ ەتكەن روماندارى مەملەكەت جانە قالىڭ كوپشىلىك تاراپىنان جوعارى باعاسىن الدى. قارىمدى قالامگەر ەلىمىزدىڭ رۋحاني سالاسىن دامىتۋعا مول ەڭبەك ءسىڭىردى. ونەگەلى عۇمىر كەشىپ، سوڭىنا وشپەس ءىز، سارقىلماس مۇرا قالدىرعان قابدەش ءجۇمادىل ۇلىنىڭ ەسىمى مەن جارقىن بەينەسى حالقىمىزدىڭ جۇرەگىندە ماڭگى ساقتالادى" دەلىنگەن جەدەلحاتتا.
پىكىر قالدىرۋ