ءبىلىم جانە عىلىم ۆيسە-مينيسترى شولپان كارينوۆا بيىل ۇلتتىق ءبىرىڭعاي تەستىلەۋ ەلەكتروندىق فورماتتا وتكىزۋ جوسپارلانىپ وتىرعانىن ايتتى. بۇل تۋرالى ول ورتالىق كوممۋنيكاسيالار الاڭىندا وتكەن بريفينگتە مالىمدەدى.
– ۇبت-نى ەلەكتروندىق فورماتتا جۇرگىزىلۋ جوسپارلانۋدا. 2004 جىلدان بەرى ۇلتتىق ءبىرىڭعاي تەستىلەۋ قاعاز فورماتىندا وتكىزىلىپ كەلەدى. باستاپقىدا ۇبت-نى وتكىزۋ ەكى فۋنكسيانى الىپ ءجۇردى. ءبىرىنشىسى، مەكتەپ بىتىرۋگە بايلانىستى قورىتىندى اتتەستاتتاۋ جۇمىستارى مەن مەكتەپ بىتىرگەنى جونىندە اتتەستات الۋ ءۇشىن جانە جوو تۇسۋگە مەملەكەتتىك گرانتتار كونكۋرسىنا قاتىسۋ فۋنكسياسىن الىپ جۇرگەن بولاتىن. بۇگىنگى كۇنى ۇبت تەك جوعارى وقۋ ورىندارىنا ءتۇسۋ ءۇشىن مەملەكەتتىك گرانتتى جەڭىپ الۋ كونكۋرسىنا قاتىسۋ مەحانيزمى قىزمەتىن اتقارادى. بۇل – الەمدىك پراكتيكا، – دەدى ۆيسە-مينيستر.
مەملەكەتتىك ءبىلىم گرانتىن تاعايىنداۋ كونكۋرسىنا قاتىسۋ ءۇشىن ۇبت 15 ساۋىردە باستالىپ، 30 ماۋسىمعا دەيىن جالعاسادى.
ۇبت-عا ءوتىنىشتى http://app.testcenter.kz/ سايتى ارقىلى بەرۋگە بولادى.
"ۇبت ەلەكتروندىق فورماتتا "ءبىر تەستىلەنۋشى – ءبىر كومپيۋتەر – ءبىر كامەرا" قاعيداتى بويىنشا ۇيىمداستىرىلادى. اۋديتوريادا نە بولىپ جاتقانىن كورسەتەتىن كامەرالاردان باسقا، تەستىلەنۋشى وتىراتىن ءار ۇستەلدىڭ ۇستىندە تاعى ءبىر كامەرا ورناتىلادى. پروكتورينگ پەن بەينەباقىلاۋدىڭ زاماناۋي جۇيەسى جانە ۇبت-دا بوگدە ادامداردى بولدىرماۋ ءۇشىن Face ID سيفرلىق سايكەستەندىرۋ قۇرىلعىسى پايدالانىلادى" دەلىنگەن رەسمي سايت تاراتقان حابارلامادا.
مينيسترلىكتىڭ مالىمدەۋىنشە، گرانت ۇتىپ الۋ ءۇشىن تالاپكەرلەر ۇبت-نى ەكى رەت تاپسىرا الادى.
- تالاپكەر ءساۋىر ايىندا تەستىلەۋدەن وتكەن بولسا، ونىڭ ۇبت-نى ەكىنشى رەت بىرنەشە كۇننەن كەيىن نەمەسە مامىر، نە ماۋسىم ايلارىندا تاپسىرۋ مۇمكىندىگى بولادى؛
- مەملەكەتتىك ءبىلىم بەرۋ گرانتىن الۋ كونكۋرسىنا قاتىسۋ ءۇشىن وقۋعا ءتۇسۋشى ەڭ جاقسى ناتيجەسى بار سەرتيفيكاتتى ۇسىنا الادى؛
- تەستىلەۋگە 4 ساعات (240 مينۋت) بەرىلەدى. ۇبت ناتيجەسى بويىنشا تالاپكەرلەر ەڭ جوعارى 140 بالل جيناي الادى؛
- قاتىسۋشىلار تاپسىرمالاردى كەز كەلگەن پاننەن باستاي الادى. سونداي-اق تەستىلەۋ اياقتالعانعا دەيىن جاۋاپ بەرىلگەن سۇراقتارعا قايتا ورالىپ، جاۋاپتاردى تۇزەتۋگە بولادى. تالاپكەرلەرگە ىڭعايلى بولۋ ءۇشىن ۇبت بارىسىندا كومپيۋتەر ەكرانىندا كالكۋلياتور، مەندەلەيەۆ جانە تۇزداردىڭ ەرىگىشتىگى كەستەلەرى قولجەتىمدى بولادى؛
- تەستىلەۋدىڭ 60 مينۋتىنان كەيىن وقۋشىلارعا كوزگە ارنالعان جانە دەنە جاتتىعۋلارىن ورىنداۋ ءۇشىن ەكى مينۋتتىق ءۇزىلىس، 120 مينۋتتان كەيىن 15 مينۋتتىق ءۇزىلىس بەرىلەدى؛
- ۇبت ناتيجەلەرىن تەستىلەۋ اياقتالعاننان كەيىن بىردەن بىلۋگە بولادى. تەستىلەۋ قورىتىندىسى بويىنشا جينالعان ۇپاي سانى ەكرانعا شىعارىلادى. سونداي-اق ۇبت قاتىسۋشىسى قانداي سۇراقتارعا قاتە جاۋاپ بەرگەنىن بىردەن كورە الادى؛
- ۇبت ناتيجەلەرىمەن كەلىسپەگەن جاعدايدا تالاپكەر كەلەسى كۇندى كۇتپەي-اق اپەللياسياعا ءوتىنىش بەرە الادى.
پىكىر قالدىرۋ