پرەزيدەنت ق.توقايەۆ قاراعاندى فارماسيەۆتيكا زاۋىتى شىعارعان "سپۋتنيك-V" ۆاكسيناسىن سالدىردى. بۇل تۋرالى پرەزيدەنتتىڭ باسپا ءسوز قىزمەتى حابارلادى.
"پرەزيدەنتتىڭ ۆاكسينا سالدىرعاننان كەيىنگى حال-جاعدايى جاقسى. ەشقانداي جاناما اسەرلەر جوق. مەملەكەت باسشىسى ۆاكسينا سالدىرىپ، ۇجىمدىق يممۋنيتەت قالىپتاستىرۋ ارقىلى عانا قازاقستان ازاماتتارى كوروناۆيرۋستى جەڭە الاتىنىنا، بارلىق شەكتەۋلەردىڭ الىناتىنىنا، حالىقتىڭ قالىپتى تۇرمىس-تىرشىلىگىنە قايتا ورالاتىنىنا سەنىمدى. قاسىم-جومارت توقايەۆ بارشا حالىقتى مەيلىنشە تەزىرەك ۆاكسينا سالدىرۋعا شاقىردى. بۇل – ءوزىڭدى جانە جاقىنىڭدى قورعاۋدىڭ جالعىز جولى. بۇعان دەيىن پرەزيدەنت ۇكىمەتكە جانە جەرگىلىكتى اتقارۋشى ورگاندارعا شەتەلدەن ۆاكسينا جەتكىزۋدى قامتاماسىز ەتۋدى جانە وتاندىق ۆاكسينا ءوندىرۋدى جولعا قويۋدى، سونداي-اق، ەكپە سالۋ ۇدەرىسىن ۇيىمداستىرۋدى تاپسىرعان بولاتىن" دەلىنگەن اقپاراتتىق حابارلامادا.
بۇعان دەيىن توقايەۆتىڭ وتاندىق ۆاكسينا سالدىراتىنى حابارلانعان. بۇنى كەشە، 5 ساۋىردە پرەزيدەنتتىڭ باسپا ءسوز حاتشىسى بەرىك ءۋالي حابار24 ارناسىنا بەرگەن سۇحباتتا قايتالاپ ايتقان.
پىكىر قالدىرۋ