شىعىسقازاقستاندىق اقىن سەرىك قۇسانبايەۆ facebook-تا جۋىردا عانا شىعىس قازاقستان وبلىسى دەنساۋلىق ساقتاۋ باسقارماسىنىڭ باسشىسى لاۋازىمىنا تاعايىندالعان ەرمەك وماربەكوۆ قازاق تىلىندە سۇحبات بەرە الماعانىن ايتىپ، مەملەكەتتىك قىزمەتكە تاعايىندالاتىن كەز كەلگەن ادام مەملەكەتتىك ءتىلدى بىلۋگە تيىستىگى تۋرالى زاڭ قابىلداۋ قاجەتتىگىن جەتكىزدى.
"ءبىر توپ تەلەجۋرناليستىڭ ورىس تىلىندە قويعان ساۋالدارىنا ورىسشا جاۋاپ بەرىپ تۇرعان باسقارما باسشىسىنا قازاق جۋرناليستەرىنىڭ ءبىرى:
– ەرمەك سەمباي ۇلى! وسى ايتقاندارىڭىزدى قازاق تىلىندە قىسقاشا ايتىپ بەرمەيسىز بە؟ – دەپ ءوتىنىش جاساپ ەدى، الگى "قازاق ازاماتىمىز" بويىن توك سوعىپ وتكەندەي سەلك ەتە قالدى.
ءسويتتى دە: – جو – جو – جوق، ايتىپ بەرە المايمىن! – دەپ ات تونىن الا قاشتى دا، بۇرىلىپ اپ جونىنە كەتتى. قازاق ءتىلدى جۋرناليست قانشاما ارىپتەستەرىنىڭ الدىندا جەر بولىپ قالا بەردى... مىنە، ءبىزدىڭ "ازاماتىم!" دەپ ءىشىمىز جىلىپ، كوڭىلىمىزگە جاقىن تارتقان قانداسىمىزدىڭ انا سۇتىمەن دارىعان انا تىلىنە، قالا بەردى بىلدەي ءبىر مەملەكەتتىڭ مەملەكەتتىك تىلىنە دەگەن قۇرمەتى.
بۇل سوندا قالاي بولعانى؟ پارتيالىق تىزىممەن ەش قيىندىقسىز ويناپ-كۇلىپ ءجۇرىپ پارلامەنت تورىنەن ورىن العان دەپۋتاتتارىمىز مىڭقىلداپ انت بەرە الماسا، جەرگىلىكتى دەنساۋلىق سالاسىنىڭ باسشىسى "مەملەكەتتىك تىلدە سۇحبات بەرمەيمىن!" دەپ كەرگيتىن بولسا، ءبىز وسى "ءتىل! ءتىل!" دەپ نەسىنە 30 جىلدان بەرى اق تەر، كوك تەر بوپ ءجۇرمىز؟ بۇل دەگەنىڭىز – بارىپ تۇرعان بەيباستاقتىق، قازاق دەيتىن مەملەكەتقۇراۋشى تۇتاس ءبىر ۇلتتىڭ ءتىلىن، ابىرويى مەن نامىسىن كوزىمىزدى باقىرايتىپ قويىپ قورلاۋ، تابانعا سالىپ تۇرىپ تاپتاۋ ەمەس پە؟" دەيدى اشىنعان اقىن.
سەرىك قۇسانبايەۆ "وماربەكوۆ سەكىلدى ءوز تىلىنەن بەزىنگەندەردى كورگەندە" ءتۇڭىلىپ كەتەتىنىن ايتىپ، "ءتالىمىن اپ اكەي مەنەن شەشەيدىڭ، بالا بولدىم، سول قوعامدا ەسەيدىم. ءجۇرىپ-جۇرىپ ويعا قالام كەي كۇنى، بىزگە وسى قازاق ءتىلى قاجەت پە، مەملەكەتتىك ءتىلى باردا رەسەيدىڭ...؟ – دەيتىن كۇن شىنىمەن دە تاياپ قالدى ما...؟" دەپ الاڭداۋشىلىعىن بىلدىرەدى.
اقىن ءسوز سوڭىندا "مەملەكەتتىك قىزمەتكە تاعايىندالاتىن كەز كەلگەن ۇلتتىڭ وكىلى مەملەكەتتىك ءتىلدى جەتىك مەڭگەرمەگەن بولسا، ول ادام قىزمەتكە قابىلدانۋعا ەشقانداي قۇقى بولماۋى كەرەك!" دەگەن سۇراقتى پارلامەنتتىڭ كۇن تارتىبىنە قويىپ، ۇكىمەتتەن زاڭدى تۇردە تالاپ ەتەتىن ۋاقىت جەتتى" دەيدى.
قازاقستاندا قازاق ءتىلىنىڭ قولدانىسىن كەڭەيتۋ تۋرالى 30 جىلدان بەرى ايتىلىپ كەلەدى. الايدا قوعامدا قازاق ءتىلى تولىقتاي قولدانىس قۇرالىنا اينالعان جوق. ءالى كۇنگە دەيىن قالالار مەن ورتالىق، شىعىس جانە سولتۇستىك وڭىرلەردە ازاماتتار مەملەكەتتىك تىلدە سويلەي بەرمەيدى، قىزمەت الۋ كەزىندە دە قيىندىقتار ءجيى كەزدەسەدى. مەملەكەتتىك قىزمەتتە مەملەكەتتىك تىلگە شورقاق ماماندار بار. بيىلعى قاڭتاردا ءماجىلىستىڭ جاڭا قۇرامىنا ەنگەن كەي دەپۋتاتتار قازاقشا انت بەرۋ كەزىندە سوزدەرىن قايتا-قايتا ۇمىتىپ، جازىپ العان سوزدەرىن ەجىكتەپ وقىعان، كەي سوزدەرگە ءتىلى كەلمەي، ماعىناسىن بۇزىن ايتقان.
جۋىردا عانا ءتىل مايدانى قوزعالىسى نۇر-سۇلتان قالاسىنداعى دۇكەندەردىڭ بىرىندە قازاق تىلىندە قىزمەت كورسەتۋدى سۇراعان قاريانى كۇزەتشى "ارانداتۋشىسىڭ" دەپ يتەرىپ جىبەرگەنىن حابارلاعان.
ارتىنشا باس پروكۋروردىڭ ورىنباسارى بولات دەمبايەۆ ماجىلىستە دەپۋتاتتاردىڭ قازاقشا قويعان سۇراعىنا جاۋاپ بەرە الماعانى بەينەلەنگەن ۆيدەو تارادى.
جاقىندا ءماجىلىس دەپۋتاتى قازىبەك يسا سوتتار مەن قۇقىق قورعاۋ ورگاندارىنىڭ قىزمەتكەرلەرىن جانە بارلىق مەملەكەتتىك قىزمەتكەرلەردى قازاق ءتىلىن بىلۋگە مىندەتتەۋ كەرەك ەكەنىن ايتىپ، ۇكىمەت باسشىسى اسقار مامينگە دەپۋتاتتىق ساۋال جولداعان.
