الماتى اكىمى باقىتجان ساعىنتايەۆ جۇمىس ساپارى كەزىندە ينجەنەرلىك جانە الەۋمەتتىك ينفراقۇرىلىم سالىنىپ جاتقان ءبىرقاتار ىقشاماۋدانداردا بولدى، سونىمەن قاتار اۋماقتاردى اباتتاندىرۋ جوبالارىمەن تانىستى.

مەگاپوليس اكىمى Instagram-داعى ءوزىنىڭ پاراقشاسىندا ينجەنەرلىك قۇرىلىمدى جاڭارتۋ مەن نىعايتۋدىڭ ماڭىزدى ەكەنىن اتاپ ءوتتى.

«مۇزتاۋ ىقش.-دا تاراتۋ جەلىلەرى سالىنۋدا. بيىل ۇيلەردى سۋمەن جابدىقتاۋ جانە سۋ بۇرۋ جۇيەسىنە قوسۋعا كىرىسەمىز. ءورت ءسوندىرۋ دەپوسى مەن ءبىرىڭعاي كەزەكشى-ديسپەچەرلىك قىزمەتتىڭ قۇرىلىس الاڭدارىندا بولدىم»-، دەپ جازدى ب.ساعىنتايەۆ.
الماتى اكىمى قايتا جوندەۋدەن وتكەن جانە قوسىمشا ورىندارى بار №54 مەكتەپتە دە بولدى.

قالا تۇرعىندارى جۇمىسپەن قامتۋ، تۇرعىن ءۇي جانە ت.ب. سالاداعى 50 ءتۇرلى ماسەلەلەرگە قاتىستى «ءبىر تەرەزە» قاعيداتى بويىنشا كەڭەس الا الاتىن الەۋمەتتىك قىزمەت كورسەتۋ ءۇيىنىڭ جۇمىسى اياقتالۋعا جاقىن.

ايتا كەتەرلىگى، الاتاۋ اۋدانىندا 14 كورتقا ارنالعان جاڭا تەننيس ورتالىعى مەن جابىق شاعىن فۋتبول الاڭى، ۇستەل تەننيسى بار ورتالىعىنىڭ، سونداي-اق العاباستاعى 12 مىڭ ادامعا ارنالعان مەشىتتىڭ قۇرىلىسى جالعاسۋدا. ورتالىق مادەنيەت جانە دەمالىس ساياباعىنداعى ۆەلوترەكتى جوندەۋدەن وتكىزۋ تۋرالى شەشىم قابىلداندى.

سونىمەن قاتار، الماتى اكىمى ب. ساعىنتايەۆ قۇرىلىس ساپاسىن باقىلاۋدى كۇشەيتۋدى، كوشە كەڭىستىگىن جاقسارتۋ بويىنشا جۇمىستار جۇرگىزۋدى تاپسىردى. تولە بي كوشەسىندەگى جولداردىڭ جوندەلۋى – ەرەكشە باقىلاۋدا.