قازاقستاننىڭ باس مەملەكەتتىك سانيتار دارىگەرى ەرلان قياسوۆ كارانتين تۋرالى قاۋلىعا وزگەرىستەر ەنگىزدى.
قاۋلىدا پتر انىقتاماسى جوق جولاۋشىلار اۋە كەمەسىنىڭ بورتىنا وتىرعىزۋعا جىبەرىلمەيتىنى جازىلعان. بۇل وزگەرىس شەتەلدەن قازاقستانعا ۇشىپ كەلەتىن رەيستەرگە قاتىستى.
سونىمەن قاتار قۇجاتتا 1-قوسىمشانىڭ 5-تارماعى، ياعني قازاقستاندىقتاردى كوروناۆيرۋسقا تەكسەرۋ ءۇشىن ەكى تاۋلىككە وقشاۋعا الادى دەگەن تالاپتى الىپ تاستالعان.
"كارانتين شارالارىن قاتاڭداتۋ تۋرالى شەشىمدى قالىپتاسقان ەپيدەميولوگيالىق جاعدايعا بايلانىستى حالىقتىڭ سانيتاريالىق-ەپيدەميولوگيالىق سالاماتتىلىعى سالاسىنداعى قىزمەتتى جۇزەگە اسىراتىن وبلىستاردىڭ، الماتى، نۇر-سۇلتان، شىمكەنت قالالارىنىڭ باس مەملەكەتتىك سانيتار دارىگەرلەرى، قازاقستان رەسپۋبليكاسى قورعانىس مينيسترلىگىنىڭ قۇرىلىمدىق بولىمشەلەرىنىڭ، ۇلتتىق قاۋىپسىزدىك جانە ىشكى ىستەر ورگاندارىنىڭ باسشىلارى قابىلدايدى.
كارانتين شارالارىن جەڭىلدەتۋ تۋرالى شەشىمدى قالىپتاسقان ەپيدەميولوگيالىق جاعدايعا بايلانىستى قازاقستان رەسپۋبليكاسىنىڭ باس مەملەكەتتىك سانيتار دارىگەرى قابىلدايدى" دەلىنگەن قۇجاتتا.
قاۋلىنىڭ تولىق نۇسقاسى مىنا جەردە.
پىكىر قالدىرۋ