ول مەكتەپتە وقىعاندا ءوزىن اقىماق سەزىندى. ۇلگەرىمى ناشار بولعان سوڭ، وزىنە سەنىمى جوعالىپ، سوڭى جالعىزدىققا ۇلاستى. باسقالاردان بولەكتەنىپ، دەپرەسسياعا ءتۇستى. مۇنى بايقاعان اكە-شەشەسى ونى دارىگەرگە جانە پسيحولوگتارعا اپارىپ ءجۇردى.

بىردە ول اكە-شەشەسىنە اكتەرلىك شەبەرلىك كۋرسىنا بارعىسى كەلەتىنىن ايتتى.

ول كۋرسقا بارعان سوڭ عانا ءوزىنىڭ قورقىنىشى مەن سەنىمسىزدىگى جوعالا باستاعانىن ءبىلدى. ول سول كەزدە ءوزىن العاش رەت اقىلدى سەزىنگەنىن ايتتى. ول وعان دەيىن ءوزىن مۇلدە ءقادىرسىز، قۇنسىز ادام رەتىندە ويلاپ، ومىردەن كۇدەر ۇزگەن كەزىن ەسكە الدى.

ول سەنارييدى وقىعاندا، كەيىپكەردىڭ نە ايتپاعىن، ىشكى سەزىمىن ءبىلىپ تۇرعانداي سەزىندى. وسىلايشا ول ءوزىنىڭ الەمىن تاپتى.

ول 14 جاسىندا ورتا مەكتەپتەن شىعىپ قالىپ، اكتەرلىك جولعا تۇسكەن دجەننيفەر لوۋرەنس ەدى.

دەگەنمەن ونىڭ نيۋ-يوركتە باستالعان ءمانساپ جولى وڭاي بولا قويمادى. نيۋ-يوركتە ءوز ماماندىعىن دامىتۋ ءۇشىن، قارجىلىق قيىندىق كورىپ، تىشقاندار ءورىپ جۇرەتىن، ىستىق سۋى دا جوق بولمەدە تۇرۋىنا تۋرا كەلدى. تىشقاندار بولمەدەگى ناندى جەپ قوياتىن. لوۋرەنس ناننىڭ تىشقان جەگەن جەرلەرىن كەسىپ، تازا جەرىن جەگەن كۇندەر دە بولعان. ول كەزدە قارجىلىق قيىندىقتا ءومىر سۇرگەندىكتەن، ناندى لاقتىرىپ جىبەرۋ وعان ۇلكەن شىعىن ەدى.

ال بۇگىن دجەننيفەر لوۋرەنس گولليۆۋدتا 4 رەت اكادەميالىق ماراپات العان ەڭ جاس اكتريسا. ول وسكاردىڭ ەڭ ۇزدىك اكتريساسى سىيلىعىن 22 جاسىندا العان. ال ونىڭ تابىسى 130 ميلليون دوللار. ءسويتىپ ول ەڭ تابىستى، ەڭ تالانتتى، ەڭ جاس اكتريسا بولدى.

"اعاشقا ورمەلەۋ قابىلەتى ارقىلى باعالاسا، بالىق ءوزىن ءومىر بويى توپاس سەزىنىپ وتەدى" دەگەن ەكەن اتاقتى فيزيك البەرت ەينشتەين. ادامداردىڭ ءار ءتۇرلى نارسەگە تالانتى بولادى. سول تالانتتى اشا بىلسە، بارلىق ادام ءوز الەۋەتىن كورسەتە الادى.