شىعىس قازاقستان وبلىسىنىڭ باس مەملەكەتتىك سانيتار دارىگەرىنىڭ جاڭا قاۋلىسى جاريالاندى.

قاۋلىدا وڭىردە كارانتين 3 مامىرعا دەيىن ۇزارتىلاتىنى ايتىلعان. سونىمەن قاتار وبلىستا شەكتەۋ شارالارىنىڭ رەجيمى مەن مەرزىمدەرى ەپيدەميولوگيالىق احۋالدىڭ وزگەرۋىنە سايكەس قايتا قارالۋى مۇمكىن.

بۇگىن شىعىس قازاقستان وبلىسىنىڭ وسكەمەن، سەمەي جانە اياگوز قالالارى كوروناۆيرۋس بويىنشا ەپيدەميولوگيالىق جاعدايدى باعالاۋ ماتريساسىنا سايكەس "قىزىل" ايماققا كىردى.

"بورودۋليحا، شەمونايحا، ءۇرجار، زايسان، اياگوز اۋداندارى مەن سەمەي قالاسىنىڭ اكىمدەرى، شقو دەنساۋلىق ساقتاۋ باسقارماسى، وبلىستىق مەملەكەتتىك كىرىستەر جانە پوليسيا دەپارتامەنتى، قالالار مەن اۋدانداردىڭ سانيتارلىق-ەپيدەميلوگيالىق باقىلاۋ باسقارمالارى الماتى وبلىسى تاراپىنا قويىلاتىن ەكى، قاراعاندى وبلىسى تاراپىنان قويىلاتىن ءبىر جانە اياگوز اۋدانى اۋماعىنداعى ەكى سانيتارلىق بەكەتتىڭ جۇمىسىن قامتاماسىز ەتۋى ءتيىس" دەلىنگەن قۇجاتتا.

قاۋلىعا سايكەس، جوعارىدا كورسەتىلگەن وبلىستىڭ 3 ايماعىندا:

عيماراتتاردىڭ سىرتىنداعى ازىق-تۇلىك بازارلارى مەن ازىق-تۇلىك ساتپايتىن بازارلار سەنبى كۇنى ساعات 17.00-گە دەيىن جۇمىس ىستەيدى، جەكسەنبى كۇنى جۇمىس ىستەمەيدى.

عيماراتتاردىڭ ىشىندەگى ازىق-تۇلىك بازارلارى مەن ازىق-تۇلىك ساتپايتىن بازارلار سەنبى جانە جەكسەنبى كۇندەرى جۇمىس ىستەمەيدى.

ازىق-تۇلىك ەمەس تاۋارلاردى ساتاتىن ساۋدا وبەكتىلەرى (سۋپەرماركەتتەر، گيپەرماركەتتەر، ساۋدا ۇيلەرى، ساۋدا جەلىلەرى، سوو) جۇمىس كۇندەرى ساعات 21.00-گە دەيىن جۇمىس ىستەيدى، سەنبى جانە جەكسەنبى كۇنى جۇمىس ىستەمەيدى.

ازىق-تۇلىك تاۋارلارىن ساتاتىن ساۋدا وبەكتىلەرىنىڭ (دۇكەندەر، بولىمدەر، شاعىن ماركەتتەر، زوودۇكەندەر) قىزمەتى شەكتەۋسىز، اپتانىڭ بارلىق كۇندەرى جۇمىس ىستەيدى.

ازىق-تۇلىك تاۋارلارىن ساتپايتىن ساۋدا وبەكتىلەرى (دۇكەندەر، بولىمدەر، شاعىن ماركەتتەر، بۋتيكتەر) اپتانىڭ بارلىق كۇندەرى جۇمىس ىستەيدى.

حالىقتىڭ تۇرۋى بويىنشا قىزمەتتەر كورسەتۋ سالاسىنداعى ۇيىمدار (قوناق ۇيلەر، وتەلدەر، ساناتوريي-كۋرورتتىق ۇيىمدار، دەمالىس ۇيلەرى/بازالارى، تۋريستتىك بازالار جانە ت. ب.) نومەرلەر قورى تولتىرىلۋىنىڭ 80%-ىنا دەيىن جۇمىس ىستەي الادى.

قوعامدىق تاماقتانۋ وبەكتىلەرى (ءۇي-جايلارداعى) ساعات 09.00-دەن 20.00-گە دەيىن جۇمىس ىستەيدى. فۋدكورتتارعا ۋاقىت بويىنشا شەكتەۋمەن ساعات 9.00-دەن 18.00-گە دەيىن، قالعان ۋاقىتتا تەك تاماق الىپ كەتۋگە جانە جەتكىزۋگە رۇقسات بەرىلگەن.

مەكتەپكە دەيىنگى بالالار مەكەمەلەرىندە/ۇيىمدارىندا 15 ادامنان اسپايتىن توپتاردى جيناقتاۋ ساقتالعان كەزدە كەزەكشى توپتاردىڭ بولۋىنا رۇقسات بەرىلگەن.

جالپى ءبىلىم بەرەتىن مەكتەپتەردە مەكتەپ الدى سىنىپتاردىڭ، 1 سىنىپتان 5 سىنىپقا دەيىن قوسا العاندا، حالىقارالىق مەكتەپتەردە-1 سىنىپتان 7 سىنىپقا دەيىن قوسا العاندا، سىنىپتاردا 25-كە دەيىن بالا سانىمەن وقۋشىلار ارالاس فورماتتا وقيدى.

وقۋ بىتىرەتىن 9، 11 (12) سىنىپتار اپتانىڭ 6 كۇنى ىشىندە ارالاس وقيدى. پاندەردىڭ 70%-ىن شتاتتىق رەجيمدە، 30%-ىن قاشىقتان وقۋ فورماتىندا جۇزەگە اسىرىلادى (سىنىپتا 15 ادامنان ارتىق ەمەس، «1 سىنىپ - 1 كابينەت» قاعيداتى بويىنشا وقىتۋ).

قىزمەتكەرلەردىڭ قاشىقتان جۇمىس ىستەۋى كەلەسى فورماتتا جۇزەگە اسىرىلادى: 20% – كۇندىزگى جۇمىس ىستەۋ رەجيمى، 80% – قاشىقتان جۇمىس ىستەۋ رەجيمى.

ساۋنالار سەنبى، جەكسەنبى كۇندەرى جۇمىس ىستەمەيدى.

وسى قاۋلى 2021 جىلعى 23 ساۋىردەن باستاپ كۇشىنە ەنەدى جانە ونىڭ رەسمي كۇشى جويىلعانعا دەيىن قولدانىلادى.