ءماجىلىستىڭ جالپى وتىرىسىندا دەپۋتات، اقجول پارتياسىنىڭ وكىلى ماقسات رايىمقۇلوۆ پرەمەر-مينيستردءىڭ ورىنباسارى ەرالى توعجانوۆقا الەۋمەتتىك سالاداعى قاتارداعى قىزمەتكەرلەردىڭ جالاقىسىن كوتەرۋ ماسەلەسىن قاراستىرۋدى سۇراپ، دەپۋتاتتىق ساۋال جولدادى.

دەپۋتات رەسمي ساۋالدا سانيتار، اسسيستەنت، ەدەن جۋۋشى، جەدەل جاردەم جۇرگىزۋشىسى سەكىلدى قاتارداعى قىزمەتكەرلەر مەن مۇراجاي، ونەر، مەكتەپ، بالاباقشا، كىتاپحانا، مۇراعات سالاسىنداعى ماماندار ارىپتەستەرى ءۇشىن مەملەكەت جىل سايىن جالاقىنى كوبەيتىپ، كوپتەگەن جىلدار بويى وزدەرىنىڭ ەڭبەكاقىسى وزگەرىسسىز قالىپ وتىرعانىنا ءجيى شاعىناتىنىن جەتكىزگەن.

ونىڭ ايتۋىنشا، مۇراعات، مۇراجاي جانە كىتاپحانا قىزمەتكەرلەرىنىڭ تاريحشىلار، ونەرتانۋشىلاردىڭ ورتاشا جالاقىسى 60 مىڭ تەڭگەنى قۇرايدى. جەدەل جاردەم جۇرگىزۋشىلەرىنىڭ جالاقىسى شامامەن 70-75 مىڭ تەڭگە جانە 5 جىلدان استام ۋاقىت بويى جوعارىلاماعان. مەكتەپتەر مەن بالاباقشالاردىڭ تەحنيكالىق قىزمەتكەرلەرىنىڭ جالاقىسى شامامەن 50 مىڭ تەڭگە.

– سونىمەن قاتار، ينفلياسيانىڭ ەكونوميكالىق سيپاتىن ەشكىم جويعان جوق، مەملەكەتتىك ورگاندار تاۋارلار مەن ازىق-تۇلىك باعاسىنىڭ ءوسۋىن ايتپاعاننىڭ وزىندە، تۇرعىن ءۇي كوممۋنالدىق شارۋاشىلىعىنداعى مونوپوليستەر تاريفتەردى ۇنەمى ۇلعايتادى. ءبىزدىڭ ازاماتتارىمىزدىڭ بۇل ساناتى ءتىپتى يپوتەكا بويىنشا تۇرعىن ۇيگە قول جەتكىزە المايدى جانە ونداعان جىلدار بويى جالدامالى پاتەرلەردە تۇرادى. جالاقىلارىنا دۇرىس كيىنە المايدى، بالالارىن اسىراي المايدى، كۇندەلىكتى ماسەلەلەردى شەشە المايدى. الايدا بۇل ازاماتتار ءبىزدىڭ مەملەكەت رەتىندە جاۋاپ بەرەتىن ماماندارىمىز ەمەس پە؟! وسىنداي جالاقىعا قالاي ءومىر ءسۇرسىن؟ ءبىز تەحنيكالىق كادرلاردىڭ الەۋمەتتىك سالاداعى، ياعني ءبىلىم بەرۋ، دەنساۋلىق ساقتاۋ جۇيەسىندەگى، مادەنيەتتەگى مۇددەلەرىن قورعاۋ ماسەلەسى مەملەكەت نازارىنان تىس قالدى دەپ سانايمىز. وسىعان بايلانىستى "اق جول" فراكسياسى الەۋمەتتىك سالاداعى جالاقىنى كوتەرۋ كەزىندە ءبىر مەزگىلدە تەحنيكالىق قىزمەتكەرلەردىڭ ەڭبەكاقىسىن كوتەرۋ قاجەت دەپ ەسەپتەيدى. سوندىقتان ءبىز الەۋمەتتىك سالانىڭ كومەكشى جانە تەحنيكالىق قىزمەتكەرلەرىنە قاتىستى ادىلەتتىلىك تانىتۋدى، جالاقىنى كوتەرۋ كەزىندە ولاردى نازاردان تىس قالدىرماۋدى سۇرايمىز.

نەلىكتەن ءبىزدىڭ وسى سالاداعى ماماندارىمىز قينالۋى كەرەك، ولاردىڭ دا كوپتەگەن پروبلەمالارى بار ەمەس پە، ولار دا ءبىزدىڭ مەملەكەتىمىزدىڭ ازاماتتارى عوي؟!  مەنىڭ بىلۋىمشە، وسى ازاماتتاردىڭ 90 پايىزىنىڭ شاعىن نەسيەلەرى بار، قارىزعا بەلشەسىنەن باتقان، شىعارماشىلىق تۋىندىلارىن شىعارۋعا قاراجاتى جوق، ۇكىمەت تاراپىنان ناقتى كومەك تە جوق. اتالعان فاكتورلار الەۋمەتتىك "جارىلىسقا" ۇلاسۋى مۇمكىن الەۋمەتتىك شيەلەنىستى كۇشەيتە تۇسەدى.

جوعارىدا ايتىلعاندارعا بايلانىستى، "اق جول" دەپۋتاتتىق فراكسياسى ايتىلعان ماسەلەگە نازار اۋدارۋدى قاجەت دەپ ەسەپتەيدى جانە اتالعان ساناتتاعى قىزمەتكەرلەردى لايىقتى تابىس دەڭگەيىمەن قامتاماسىز ەتۋ مۇمكىندىگىن قاراۋدى سۇرايدى، – دەپ مالىمدەدى پارتيا مۇشەسى.