پرەزيدەنت قاسىم-جومارت توقايەۆ باس پروكۋرور عيزات نۇرداۋلەتوۆتى قابىلدادى، دەپ اقوردا سايتى حابارلادى.
باس پروكۋرور مەملەكەت باسشىسىنا ەلدەگى زاڭدىلىق پەن قۇقىق قورعاۋ سالاسىنىڭ احۋالى، پروكۋراتۋرا ورگاندارىنىڭ ءبىرىنشى جارتىجىلدىقتا اتقارعان جۇمىستارىنىڭ قورىتىندىلارى تۋرالى ايتقان.
سونداي-اق قىلمىستىق پروسەستىڭ 3 بۋىندى مودەلىنە كوشۋدىڭ ءبىرىنشى كەزەڭىن ىسكە اسىرۋ ناتيجەلەرى تۋرالى اقپارات بەردى.
ع. نۇرداۋلەتوۆتىڭ ايتۋىنشا، سوتقا دەيىنگى تەرگەۋ ورگاندارى پروكۋرورلارمەن نەگىزگى شەشىمدەرىن كەلىسۋدىڭ ارقاسىندا ازاماتتاردىڭ كونستيتۋسيالىق قۇقىقتارىن بۇزۋ 33 پايىزعا ازايعان.
كەزدەسۋ بارىسىندا باس پروكۋرور كاسىپكەرلەردى مەملەكەتتىك ورگانداردىڭ زاڭسىز ارەكەتتەرىنەن قورعاۋ، پروكۋرورلىق قاداعالاۋدى بيزنەستىڭ پروبلەمالارىن ءتيىمدى شەشۋگە قايتا باعدارلاۋ بويىنشا بەرىلگەن تاپسىرمالاردى ورىنداۋ جونىندە قابىلدانىپ جاتقان شارالار تۋرالى ايتتى.
جىل باسىنان بەرى 22 مىڭ كاسىپكەردىڭ قۇقىعى قورعالعان، 357 زاڭسىز تەكسەرۋ مەن مەملەكەتتىك ورگانداردىڭ 56 اكتىسى جويىلعان.
توقايەۆ قوعامنىڭ بارلىق سالاسىندا زاڭ ۇستەمدىگىن قامتاماسىز ەتۋدىڭ ماڭىزدىلىعىن اتاپ ءوتىپ، عيزات نۇرداۋلەتوۆكە ءبىرقاتار تاپسىرما بەردى.
پىكىر قالدىرۋ