پرەزيدەنت قاسىم-جومارت توقايەۆ وبلىس اكىمىنە ءىرى وندىرىستىك كاسىپورىن باسشىلارىمەن بىرلەسىپ، ىندەتتىڭ الدىن الۋدى جانە ونىمەن كۇرەس شارالارىن ۋاقتىلى قابىلداۋدى تاپسىردى. بۇل تۋرالى مەملەكەت باسشىسى اتىراۋ وبلىسىنىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەستە مالىمدەدى.
– ىندەتتىڭ جاڭا تولقىنى كەلگەننەن بەرى جاعدايى اۋىر جانە وتە اۋىر ناۋقاستار كوبەيۋدە. ولاردىڭ سانى سوڭعى ءبىر ايدا ەكى ەسەگە ارتتى. ال ەمدەۋ مەكەمەلەرىندە قاجەتتى دارى-دارمەك پەن قۇرال جابدىقتار ءالى دە جەتكىلىكسىز ەكەنى انىقتالىپ وتىر. بۇل احۋال ادام ءولىمىنىڭ كۇرت وسۋىنە اكەپ سوقتىرۋى مۇمكىن. بىلىكتى مامانداردىڭ تاپشىلىعى دا جاعدايدى ۋشىقتىرىپ وتىر. وبلىستا 207 دارىگەر جەتىسپەيدى. سونىڭ ىشىندە اۋىلدىق جەرلەرگە 52 دارىگەر قاجەت، – دەدى توقايەۆ.
پرەزيدەنت وبلىس باسشىلىعىنا ەمدەۋ مەكەمەلەرىن دارى-دارمەكپەن جانە مەديسينالىق قۇرالمەن قامتاماسىز ەتۋ، انەستەزيولوگيا جانە جان ساقتاۋ بولىمدەرىن تولىق جابدىقتاۋ، دارىگەرلەر تاپشىلىعى ماسەلەسىن شەشۋ مىندەتىن جۇكتەدى.
پىكىر قالدىرۋ