پرەزيدەنت قاسىم-جومارت توقايەۆتىڭ جارلىعىمەن جاڭادان قۇرىلعان تۇركىستان وبلىسى ساۋران اۋدانىنىڭ العاشقى اكىمى تاعايىندالدى. بۇل تۋرالى وبلىس اكىمىنىڭ باسپا ءسوز قىزمەتى حابارلادى.

"قازاقستان رەسپۋبليكاسى كونستيتۋسياسىنىڭ 87-بابىنا سايكەس، ق ر پرەزيدەنتى اكىمشىلىگىنىڭ كەلىسىمىمەن جانە ساۋران اۋداندىق ءماسليحاتى دەپۋتاتتارىنىڭ ءبىراۋىزدان قولداۋىمەن، ساۋران اۋدانى اكىمىنىڭ لاۋازىمىنا بۇعان دەيىن وبلىس اكىمى اپپاراتى باسشىسىنىڭ ورىنباسارى قىزمەتىن اتقارىپ كەلگەن عاني قۇرماش ۇلى رىسبەكوۆ تاعايىندالدى" دەلىنگەن حابارلامادا.

عاني رىسبەكوۆ 1962 جىل 8 ساۋىردە تۇركىستان قالاسىندا تۋىلعان. قازاق، ءبىلىمى جوعارى. 1986 جىلى سەلينوگراد اۋىل شارۋاشىلىعى ينستيتۋتىن عالىم اگرونوم ماماندىعى، 2005 جىلى ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىن قارجىگەر ماماندىعى بويىنشا بىتىرگەن.

ەڭبەك جولىن 1979 جىلى تۇركىستان قالاسىندا چاپايەۆ اتىنداعى كولحوزدا جۇمىسشى بولىپ باستاعان. 1980-2015 جىلدار ارالىعىندا تۇلكىباس جەمىس-جيدەك زاۋىتىنىڭ جۇمىسشىسى، سەلينوگراد وبلىسى بالحاش اۋدانى ۆەسەلوۆسكيي سوۆحوزىنىڭ اعا اگرونومى، تۇركىستان اۋدانى اكىمى اپپاراتى ۇيىمداستىرۋ ءبولىمىنىڭ ينسپەكتورى، مەڭگەرۋشىسى، تۇركىستان قالاسى جاستار ءىسى سپورت جانە تۋريزم باسقارماسىنىڭ باستىعى، تۇركىستان قالاسى اكىمدىگىنىڭ شارۋاشىلىق باسقارماسى مەملەكەتتىك مەكەمەسىنىڭ باستىعى، تۇركىستان قالالىق ءماسليحاتىنىڭ حاتشىسى بولعان.

2019 جىلدان بەرى كەنتاۋ قالاسىنىڭ اكىمى، قازاقستان حالقى اسسامبلەياسى تۇركىستان وبلىستىق فيليالى ءتوراعاسىنىڭ ورىنباسارى، وبلىس اكىمى اپپاراتى باسشىسىنىڭ ورىنباسارى قىزمەتتەرىن اتقارىپ كەلدى. "ەرەن ەڭبەگى ءۇشىن" مەدالىمەن، "قۇرمەت" وردەنىمەن ماراپاتتالعان.