SpaceX كومپانياسى عارىشكەرلەردى ءۇشىنشى رەت حالىقارالىق عارىش ستانسياسىنا جىبەردى. يلون ماسكتىڭ زىمىران كومپانياسى وتكەن جىلى ەكى رەت وسىعان ۇقساس ميسسيانى تابىستى تۇردە جۇزەگە اسىرعان.
NASA مەن SpaceX كومپانياسى كۇتكەندەي عارىشقا ۇشۋ ءساتتى ورىندالدى. اقش شىعىس ۋاقىتىمەن تاڭعى ساعات 5: 49-دا (الماتى ۋاقىتى 15:49) فلوريدا شتاتىنىڭ كەننەدي اتىنداعى عارىش ورتالىعىنان SpaceX كومپانياسىنىڭ "Crew Dragon" كاپسۋلاسى كوككە كوتەرىلدى. تاڭەرتەڭ كەرى ساناۋ جوسپاردان ەرتەرەك باستالدى.
"Crew-2" ميسسياسى ەكى امەريكالىق، ءبىر جاپوندىق جانە ءبىر فرانسۋز عارىشكەردى حالىقارالىق عارىش ستانساسىنا اپارادى. "بۇل NASA-نىڭ تومەن جەر وربيتاسىنا شىعارۋ بيزنەسىن جەكە سەكتورعا بەرۋ جونىندەگى ءساتتى كۇش-جىگەرىنىڭ جالعاسى" دەپ جازادى نيۋ-يورك تايمس.
SpaceX كومپانياسى ءبىر جىل بۇرىن NASA-نىڭ ەكى عارىشكەرى بوب بەنكەن جانە داگ حەرليمەن بىرگە دەمونستراسيالىق ميسسيا وتكىزدى. ەكى عارىشكەردى الىپ جۇرگەن ەنديەۆور دەپ اتالاتىن كاپسۋلا وتكەن جىلى تامىز ايىندا اتلانت مۇحيتىنا ءتۇستى.
بىرنەشە ايدان كەيىن SpaceX كومپانياسى بورتىندا ءتورت عارىشكەرى بار "Crew Dragon" عارىش كەمەسىنىڭ وپەراسيالىق ميسسياسىن جۇزەگە اسىردى. "Crew-1" دەپ اتالاتىن بۇل ميسسيا قاراشا ايىندا ۇشىرىلعان جانە عارىشكەرلەر ءالى ستانسادا. كەلەسى اپتادا جەرگە ورالۋدى جوسپارلاپ وتىر.
بۇگىنگى ۇشىرىلىم ەكىنشى جەدەل ميسسيا بولدى. "Crew-2" عارىشكەرلەرى ساپارعا وتكەن جىلى دەمونستراسيالىق ميسسيادا قولدانىلعان ەنديەۆور كاپسۋلاسىمەن اتتاندى.
پىكىر قالدىرۋ