الماتىداعى "بۇقار جىراۋ" ءتۇرعىنۇي كەشەنىندە اتىس شىعارعان كۇدىكتى 17 قاباتتان سەكىرىپ قازا تاپتى. تومەندە ءتۇرلى باسپا ءسوز بەتتەرى مەن تەلەگرام رەسۋرستاردا جاريالانعان اقپاراتتار نەگىزىندە وقيعا حرونولوگياسى ۇسىنىلعان.

17:15. "بۇقار جىراۋ" كەشەنى تۇرعىندارىنىڭ ءبىرى قارۋلانىپ، اتىس شىعارعانى تۋرالى اقپارات تارادى. ارتىنشا ول كۇزەتشىسىنى پىشاقپەن جارالاعانى حابارلاندى. الماتى پوليسياسى اۋماقتى قورشاۋعا الىپ، تۇرعىنداردى پاتەرىنەن شىقپاۋعا شاقىردى. پوليسيا كۇدىكتىمەن بىرنەشە مارتە كەلىسسوز جۇرگىزۋگە تىرىستى. ءبىراق ودان ەشتەڭە شىقپادى. وسى ۋاقىتتا عيماراتقا باسىپ كىرۋگە دايارلىق ءجۇرىپ جاتتى.

17:57. كۇدىكتى 22 قاباتتى ءۇيدىڭ 16 قاباتىندا تۇراتىن 60 جاسقا كەلىپ قالعان ەر ادام ەكەنىن تۋرالى اقپارات شىقتى. بىرنەشە قابات تۇرعىندارى شۇعىل ەۆاكۋاسيالاندى.

18:25. ءتۇرعىنۇي كەشەنىنەن اتىس داۋىستارى ەستىلگەنى حابارلاندى. 

19:04. ءتۇرعىنۇي كەشەنى اۋماعىندا ينتەرنەت بۇعاتتالدى. وسى ۋاقىتتا اتىس شىعارعان ەر ادام كورشىلەرىنە ۇنەمى ءبىرتۇرلى كورىنەتىنى تۋرالى اقپارات تارادى.

19:19. الدىمەن 3، ودان كەيىن 5 وق اتىلعانى ەستىلدى. كۇدىكتى 50-60 جاس ارالىعىنداعى ەر ادام، كورشىلەرىمەن ۇدايى جانجالداسىپ جۇرەتىنى جاريالاندى.

19:30. جيىرما شاقتى وق داۋسى ەستىلدى.

19:55. تاعى 7 رەت وق اتىلعانى حابارلاندى.

20:04. پوليسيا كۇدىكتىمەن ديالوگقا كەلمەك بولعانىمەن، ول سويلەسۋگە قۇلىق تانىسپادى. وسى ارالىقتا كۇدىكتىنى ۇستاۋ بويىنشا ارنايى وپەراسيا جۇرگىزىلىپ جاتتى.

20:51. تك اۋماعىنا اسكەري دجيپ، قۇتقارۋشىلار، قوسىمشا پوليسيا مەن جەدەل جاردەم كولىگى كەلدى.

21:11. تەرەزەنىڭ شاعىلعانى، اتىس داۋىستارى ەستىلدى.

21:13. كۇدىكتى تەرەزەدەن سەكىرىپ كەتكەنى تۋرالى اقپارات تارادى. كەي رەسۋرستار كۇدىكتى سەكىرەردە "اللاھۋ اكبار" دەپ ايقايلاعانىن حابارلادى.

21:49. كۇدىكتىنىڭ كورشىلەرى وسىدان ەكى اپتا ءبۇرىن اتىس داۋسىن ەستىگەنىن، بۇل تۋرالى پيك وكىلدەرىنە ەسكەرتكەنىن ءمالىم ەتتى.

22:00. پوليسەي جارالانعانى تۋرالى اقپارات تارادى.

22:09. كۇدىكتىنىڭ پسيحيكاسى تۇراقسىز بولعانى، ءدىن تۋرالى ءبىرتۇرلى اڭگىمەلەر ايتقانى، ايەلى بالا-شاعىسىن الىپ، كەتىپ قالعانى تۋرالى اقپارات شىقتى.

22:16. الماتى پوليسيا دەپارتامەنتى كۇدىكتى ءولىمىن راستادى.

22:21. پد پوليسەي زارداپ شەكپەگەنىن ءمالىم ەتتى.

22:26. وقيعا ورنىنان شۇعىل بريفينگ ۇيىمداستىرىلىپ، الماتى قالاسى پوليسيا دەپارتامەنتى باسپا ءسوز قىزمەتىنىڭ وكىلى سالتانات ازىربەك كۇدىكتىنىڭ "اللاھۋ اكبار" دەپ ايقايلاعانىن جوققا شاعىردى. كۇدىكتى باسىپ كىرۋ جۇزەگە اسقانعا دەيىن سەكىرىپ كەتكەنى، 1963 جىلعى ازامات ەكەنىن بەلگىلى بولدى. جالپى جيىنتىعى 30-عا جۋىق وق اتىلعان.

22:28. قالالىق دەنساۋلىق ساقتاۋ باسقارماسى 1 ىشكى كۇزەت قىزمەتكەرى، 2 "سپەسناز" جارالانعانىن حابارلادى.

22:38. قالالىق دەنساۋلىق ساقتاۋ باسقارماسى  بۇعان دەيىن تاراتقان اقپاراتتى تەرىستەپ، تەك 1 ىشكى كۇزەت قىزمەتكەرى جارالانعانىن جاريالادى.