"بۇقار-جىراۋ" كەشەنىنىڭ تۇرعىندارى 24 ءساۋىر كۇنى الماتىدا بولعان اتىسقا پاتەر يەلەرىنىڭ كووپەراتيۆى تۇرتكى بولعانىن ايتتى. بۇل تۋرالى كتك سايتى حابارلادى. 

سايت مالىمەتىنشە، اتىس بولاتىن كۇنى بيزنەس-كلاسس ساناتىنداعى ءۇيدىڭ شارۋاشىلىعىنا جاۋاپتىلار جۇيكەسى جۇقا ازاماتتىڭ رۇقساتىنسىز جيھازىن دالاعا شىعارىپ تاستاعان. بۇل 17-پاتەر يەسىنىڭ اشۋىن تۋعىزعان. سودان ول قولىنا مىلتىق الىپ، كەشەننىڭ كۇزەتشىسىمەن جانجالداسىپ، ارتىنشا ونىڭ اياعىنان اتقان.

كورشىلەرىنىڭ ايتۋىنشا، اتىستى باستاعان رۋسلان يسايەۆ دەگەن رەسەي ازاماتى. 53 جاستاعى ەر ادام داعىستاننان قازاقستانعا ايەلى، 4 بالاسىمەن جۇمىس بابىمەن كوشىپ كەلگەن. الايدا 2 جارىم جىلدان كەيىن ايەلى بالالارىمەن بىرگە وتانىنا ورالعان. سونىمەن قوسا بۇلىكشىل ادام شەشەنستاندا سوعىسقا قاتىسقانى بەلگىلى بولدى. ول سوندا ميىنان جاراقات الىپ، اقىل-ەسىندە اۋىتقۋ پايدا بولعان. 

– ال اتىس بولاردان 10 كۇن بۇرىن پاتەرىنىڭ تەرەزەسىنە رەسەي پرەزيدەنتى پۋتينگە قارسى ۇران جازىلعان پلاكات ىلگەن. بۇل تۋرالى تۇرعىندار كوممۋنالدىق كاسىپورىنعا بىرنەشە رەت حابارلاعان. الايدا ءتيىستى مەكەمەدەن ەش ارەكەت بولماعان. ەگەر كووپەراتيۆ قىزمەتكەرلەرى جەدەل جاۋاپ بەرگەندە، قايعىلى جاعدايدىڭ الدىن الۋعا بولاتىن ەدى، – دەيدى كورشىلەر.

ءقازىر پوليسيا قىزمەتكەرلەرى قايتىس بولعان ادام ءوق-دارى سالىنعان قارۋدى قايدان العانىن انىقتاپ جاتىر. 

بۇعان دەيىن سەنبى كۇنى الماتىداعى "بۇقار جىراۋ" ءتۇرعىنۇي كەشەنىندە اتىس شىعارعان كۇدىكتى 17 قاباتتان سەكىرىپ قازا تاپقانى حابارلانعان.