پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق جاعداي قارالدى.

قازىرگى تاڭدا اۋرۋ ءوسىمىنىڭ تۇراقتانۋ ءۇردىسى بايقالادى. ۆيرۋستىڭ رەپرودۋكتيۆتى يندەكسى ازداپ تومەندەپ، 0،98 قۇرادى. اۋرۋحانا توسەكتەرىنىڭ جۇكتەمەسى 42%، رەانيماسيالىق توسەك ورىنداردىڭ جۇكتەمەسى 28% قۇرايدى.

وڭىرلەرگە 2،3 ملن استام ۆاكسينا جەتكىزىلگەن. 1،5 ملن-عا جۋىق ادام ۆاكسينانىڭ ءبىرىنشى كومپونەنتىن جانە 350 مىڭ ادام ەكىنشى كومپونەنتىن العان. بۇل ۆاكسينالاۋعا جاتاتىن حالىقتىڭ 15%-ى. قويمالاردا ۆاكسينالاردىڭ جەتكىلىكتى قورى بار.

– ۆاكسينالاۋدىڭ وسى قارقىنىن تومەندەتپەي، ونى تەك ءوسىرۋ كەرەك. حالىقتىڭ كوروناۆيرۋسقا قارسى ۆاكسيناعا قاجەتتىلىگىن بارىنشا قامتاماسىز ەتىپ، پاندەميا دەڭگەيىن تومەندەتۋ ءۇشىن بارلىق شارالار ىسكە اسىرىلۋدا. اۋىل تۇرعىندارىنا ۆاكسينا سالۋعا ەرەكشە نازار اۋدارۋ كەرەك. مامىردا ەكى ميلليوننان استام ادامدى ۆاكسينامەن قامتاماسىز ەتۋ جوسپارى ورىندالۋى ءتيىس. الەۋمەتتىك-ەكونوميكالىق وبەكتىلەردىڭ جۇمىسىن شەكتەۋدىڭ جاڭا كريتەرييلەرىن، سونداي-اق ۆاكسينا العاندارعا جەڭىلدىكتەردى ەنگىزۋدى باقىلاۋ كەرەك. بۇل اسىرەسە، قىزمەت كورسەتۋ سالاسىندا بيزنەستى جانداندىرۋعا مۇمكىندىك بەرەدى، – دەدى ا.مامين.