سونداي-اق ءبىرتانوۆ ەلەكتروندىق ءتولقۇجات قوسىمشاسى ىستەمەيتىنى تۋرالى ايىپقا دا كەلىسپەيتىنىن جەتكىزدى.

 

– ىسكە مەنىڭ تەلەفونىمنان جاسالعان سكرينشوتتى تىركەۋدى سۇرايمىن. مەن ءوزىمنىڭ جەكە دەرەكتەرىمدى ۇسىنۋعا ءازىرمىن. "دەنساۋلىق" قوسىمشاسىنان ءوزىمنىڭ ەلەكتروندىق ءتولقۇجاتىمداعى كوشىرمەنى جۇكتەي الامىن. العاش ونى 2019 جىلعى 16 قىركۇيەكتە جۇكتەدىم. ارتىنشا 2020 جىلعى 28 تامىزدا، 2021 جىلعى 23 اقپاندا، 2021 جىلعى 4 ساۋىردە جۇكتەدىم. اشىپ، ءوزىمنىڭ قاي ەمحانادا تىركەلگەنىمدى، 2020 جىلى ەكى اۋرۋحانادا Covid-19-دان ەمدەلگەنىم تۋرالى اقپاراتتى كورسەتە الامىن، – دەگەن ول قوسىمشا قىزمەتى تولىق ىستەپ تۇرعانىن، تەك تولىقتىرۋعا بايلانىستى ماسەلەلەر بارىن، ول ءۇردىس ەمحانالاردىڭ اقپارات جۇيەسى پلاتفورماعا قوسىلۋىنا بايلانىستى ەكەنىن ايتتى.

ەكس-مينيستر ەلجان ءبىرتانوۆ 2020 جىلعى 3 قاراشادا اسا ءىرى كولەمدە بيۋدجەت قارجىسىن ىسىراپ ەتۋ فاكتىسى بويىنشا كۇدىككە ءىلىنىپ، قاماۋعا الىنعان.

7 قاراشادا ءبىرتانوۆقا قاتىستى بۇلتارتپاۋ شاراسى وزگەرتىلىپ، ءۇي قاماققا الىنعان. مۇنان سوڭ ءۇي قاماققا الۋ شاراسى الدەنەشە رەت ۇزارتىلعان.

جۋىردا، 21 ساۋىردە ءبىرتانوۆقا قاتىستى ءۇي قاماققا الۋ تۇرىندەگى بۇلتارتپاۋ شاراسى 2021 جىلعى 14 مامىرعا دەيىن ۇزارتىلدى. الايدا سوت بۇل جولى وعان 8:00 مەن 19:00 ارالىعىندا ۇيىنەن شىعۋعا رۇحسات بەردى. سوت مۇنداي شەشىمدى ەكس-مينيستردىڭ بۇلتارتپاۋ شاراسىن بۇزباۋىمەن ءتۇسىندىرىپ، ەل يگىلىگى جولىندا جۇمىس ىستەۋىنە بولاتىنىن ءمالىم ەتتى. وعان دەيىن ءبىرتانوۆقا وتباسى مۇشەلەرى مەن ادۆوكاتىنان وزگە ەشكىممەن سويلەسۋگە بولمايتىن. ءتىپتى وعان شاشتاراز دا كىرگىزىلمەگەن. ەندى جاڭا شارالارعا بايلانىستى ول جۇمىسقا بارا جاتىپ جولاي جولىققان ادامدارمەن سويلەسە الادى. 8:00 مەن 19:00 ارالىعىنان تىس ۋاقىتتا شەكتەۋ بۇرىنعىشا قالا بەرەدى.

26 ساۋىردە ءبىرتانوۆتىڭ كوممەرسيالىق قۇرىلىمدا جۇمىس ىستەپ جاتقانى تۋرالى اقپارات شىقتى.