"ۆاشينگتون اسكەري كۇشتەرى وسى دەمالىس كۇندەرى اتموسفەراعا قايتا ورالادى دەپ كۇتىلگەن ءىرى قىتايلىق زىمىراننىڭ قالدىقتارىن اتۋدى جوسپارلاپ وتىرعان جوق" دەدى اقش قورعانىس ءمينيسترى للويد وستين.

جۋرناليستەرمەن سۇحباتتاسقان وستين زىمىراننىڭ مۇحيتقا قۇلايتىنىنا ءۇمىت بار ەكەنىن جانە سوڭعى بولجام بويىنشا، ونىڭ سەنبى مەن جەكسەنبى ارالىعىندا تۇسەتىندىگىن ايتتى.

– ءبىزدىڭ كوپ نارسەنى ىستەۋگە مۇمكىندىگىمىز بار، ءبىراق  زىمىراندى اتىپ تاستايتىن جوسپارىمىز جوق. ءبىز ونىڭ ەشكىمگە زيان تيگىزبەيتىن جەرگە تۇسەتىنىنە ءۇمىتتىمىز. ول مۇحيتتا نەمەسە سوعان ۇقساس جەرلەرگە قۇلايتىن بولار دەپ ۇمىتتەنەمىن، – دەدى وستين.

بەيجىڭنىڭ "Long March 5B" دەپ اتالاتىن زىمىرانى 29 ساۋىردە قىتايدىڭ حاينان ارالىنان ۇشقان. 

زىمىراننان شىققان سىنىقتار اقش-تىڭ شىعىس قالالارىن باسىپ وتكەننەن كەيىن ەكۆاتور ماڭىندا تىنىق مۇحيتىنا تۇسەدى دەپ كۇتىلۋدە. اق ءۇيدىڭ باسپا ءسوز حاتشىسى دجەن پساكي سارسەنبىدە اقش عارىش قوقىستارىنىڭ قاۋىپ-قاتەرلەرىن شەشۋگە بەل بۋعانىن جانە حالىقارالىق قاۋىمداستىقپەن "كوشباسشىلىقتى، جاۋاپتى عارىشتىق مىنەز-قۇلىقتى ىلگەرىلەتۋ ءۇشىن" جۇمىس ىستەگىسى كەلەتىنىن ايتتى.

"عارىشتىق دومەندە جۇمىس جاسايتىن ءبىز ءۇشىن ءقاۋىپسىز نەمەسە ويلاستىرىلعان رەجيمدە جۇمىس ىستەۋدىڭ ءبىر تالابى بولۋى كەرەك" دەدى اقش قورعانىس ءمينيسترى.

ال قىتايلىق تابلويد Global Times باسىلىمى سالا ينسايدەرلەرىنە سىلتەمە جاساپ، زىمىران "باقىلاۋدان تىس" جانە "زيان كەلتىرۋى مۇمكىن" دەگەن حابارلاردى "باتىستىق حايپ" دەپ سيپاتتاپ، "ۇرەيلەنۋدىڭ قاجەتى جوق" دەپ مالىمدەدى.