بۇگىن ءماجىلىس سپيكەرى نۇرلان ءنىعماتۋليننىڭ توراعالىعىمەن بيۋرو وتىرىسى ءوتىپ، وندا الداعى جالپى وتىرىستىڭ كۇن ءتارتىبى ناقتىلاندى.

دەپۋتاتتار قاراۋىنا ءبىرقاتار راتيفيكاسيالىق زاڭ جوبالارى ۇسىنىلدى. اتاپ ايتقاندا، قازاقستان مەن رەسەي اراسىنداعى پوليار ماڭىنداعى وربيتالارعا سولتۇستىك باعىتتا عارىش اپپاراتتارىن ۇشىرۋ ءۇشىن «بايقوڭىر» عارىش ايلاعىنان «سويۋز-2» تيپىندەگى تاسىمالداعىش زىمىرانداردى ۇشىرۋعا قاتىستى كەلىسىمدى، سونداي-اق، ەكى ەل اراسىنداعى «بايقوڭىر» كەشەنىن جالعا بەرۋ شارتىنا بايلانىستى زاڭ جوبالارى بار.

الداعى جالپى وتىرىستا دەپۋتاتتار الەۋمەتتىك كاسىپكەرلىكتى دامىتۋ ماسەلەلەرى بويىنشا تۇزەتۋلەردى جانە سالىق كودەكسىنە تولىقتىرۋلار ەنگىزۋ تۋرالى زاڭ جوبالارىن II وقىلىمدا قاراماق.

سونىمەن قاتار، پالاتا بيۋرو وتىرىسىندا دەپۋتاتتار ءبىرقاتار جاڭا زاڭ جوبالارىن جۇمىسقا الۋدى كوزدەيدى. ولار: رەيدەرلىككە قارسى كۇرەستى كۇشەيتۋ، كاسىپكەرلىك قىزمەتتى مەملەكەتتىك ورگاندار مەن لاۋازىمدى ادامداردىڭ زاڭسىز ارالاسۋىنان قورعاۋ جانە باعالى مەتالداردىڭ زاڭسىز اينالىمىنا كەدەرگى كەلتىرەتىن شارالاردى كۇشەيتۋ ماسەلەلەرىنە قاتىستى، سونداي-اق،  ساقتاندىرۋ نارىعىن جانە باعالى قاعازدار نارىعىن رەتتەۋ مەن دامىتۋ ماسەلەلەرى تۋرالى زاڭ جوبالارى.   

ءماجىلىستىڭ باسپا ءسوز قىزمەتى