پالاتا سپيكەرى نۇرلان ءنىعماتۋليننىڭ توراعالىعىمەن ءماجىلىس بيۋروسى ريددەردەگى تۇرعىندارعا كومەك كورسەتۋ ءۇشىن ءماجىلىس دەپۋتاتتارىنىڭ ءبىر كۇندىك جالاقىسىن اۋدارۋ تۋرالى قاۋلى قابىلدادى. بۇل تۋرالى ءماجىلىستىڭ باسپا ءسوز قىزمەتى حابارلادى.

قاراجات شىعىس قازاقستان وبلىسىنىڭ ريددەر قالاسىنا ورمان ءورتى سالدارىنان زارداپ شەككەن تۇرعىنداردىڭ ۇيلەرىن قالپىنا كەلتىرۋگە باعىتتالادى.

كەشە ريددەر قالاسىنداعى شارۋاشىلىقتاردىڭ بىرىندە قۋراعان ءشوپ جانىپ، جالىن اعاشتاردى شارپىن، ونىڭ ارتى ۇلكەن ورتكە ۇلاسقان. كۇشتى جەل سالدارىنان ءورت كورشى لەسحوز اۋىلىنا قاراي جىلدام تارالىپ، تۇرعىنۇيلەر بىرىنەن سوڭ ءبىرى وتقا ورانا باستادى. سونىڭ سالدارىنان 35 ءۇي، 9 عيمارات ورتەنىپ، 1948 جىلعى ايەل قازا تاپتى، 1949، 1980 جىلعى 2 ادام زارداپ شەكتى.

وبلىس اكىمى دانيال احمەتوۆ ورتتەن زارداپ شەككەندەردىڭ بارلىعىنا  باسپانا بەرىلەتىنىن، وعان ەكى جارىم اي قاجەت ەكەنىن ءمالىم ەتتى. مۇلىك شىعىندارى بويىنشا، ارنايى كوميسسيا جۇمىس ىستەپ، شىعىن قۇنىن انىقتايدى جانە وتەماقى تاعايىندايدى.

قازىرگى ۋاقىتتا ءتۇرعىنۇي القابى مەن شارۋاشىلىق قۇرىلىستارىندا ءورت تولىق سوندىرىلگەن، ورمان القابىندا ءسوندىرۋ جۇمىسى جالعاسىپ جاتىر.