انگليا بانكىنىڭ باسشىسى ەندريۋ بەيلي "كريپتوۆاليۋتالاردىڭ وزىندىك قۇندىلىعى جوق جانە وعان اقشا سالاتىن ادامدار بارلىق اقشالارىن جوعالتۋعا دايىن بولۋى كەرەك" دەپ سانايدى.
بيىل بيتكوين، ەفير جانە ءتىپتى دوگەكوين سياقتى ساندىق ۆاليۋتالار وتە جوعارى دەڭگەيدە ءوستى.
وسىعان بايلانىستى كەيبىر ينۆەستورلار 2017 جىلعى كريپتو كوپىرشىگى تۋرالى ەسكەرتتى. ول كەزدە بيتكوين 20 000 دوللارعا دەيىن كوتەرىلىپ، ءبىر جىلدان كەيىن 3 122 دوللارعا دەيىن قۇلدىراپ كەتكەن.
بەيسەنبىدەگى باسپا ءسوز ءماسليحاتىندا كريپتوۆاليۋتانىڭ ءوسىپ كەلە جاتقان باعاسى تۋرالى سۇراققا بەيلي "ولاردىڭ ىشكى ءمانى جوق... مەن مىنانى تاعى دا اشىق ايتقىم كەلەدى: ەگەر ءسىز بارلىق اقشاڭىزدى جوعالتۋعا دايىن بولساڭىز، عانا ولاردى ساتىپ الىڭىز" دەپ جاۋاپ بەردى.
بەيليدىڭ پىكىرلەرى ۇلىبريتانيانىڭ قارجىلىق ءىس-قيمىل اگەنتتىگىنىڭ (ءقىا) وسىنداي ەسكەرتۋىمەن ۇقساس بولدى.
"كريپتو-اكتيۆتەرگە ينۆەستيسيالاۋ نەمەسە ولارمەن بايلانىستى ينۆەستيسيالار جانە نەسيە بەرۋ، ادەتتە، وتە ۇلكەن تاۋەكەلگە بارۋدى بىلدىرەدى. ەگەر تۇتىنۋشىلار ءونىمنىڭ وسى تۇرلەرىنە اقشا سالاتىن بولسا، وندا ولار بارلىق اقشالارىن جوعالتۋعا دايىن بولۋى كەرەك" دەدى ۇلىبريتانيالىق قارجىلىق قىزمەتتەردى قاداعالاۋشى ورگان.
بەيلي، بۇرىن انگليانىڭ قارجىلىق ءىس-قيمىل اگەنتتىگىندە (ءقىا) باس اتقارۋشىسى بولعان. ول كريپتوۆاليۋتاعا بۇرىننان كۇماندانىپ كەلەدى. 2017 جىلى دا "ەگەر ءسىز بيتكوينعا اقشا سالعىڭىز كەلسە، بارلىق اقشاڭىزدى جوعالتۋعا دايىن بولىڭىز" دەپ ەسكەرتكەن.
