پارلامەنت ءماجىلىسىنىڭ جالپى وتىرىسىندا سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين قازىرگى تاڭدا 1200 اۋىلدى مەكەندە مۇلدەم ينتەرنەت جوعىن اتاپ ايتتى. ونىڭ ىشىندە 510-دا ينتەرنەت ساپاسى وتە تومەن.
ءماجىلىس ءتوراعاسى نۇرلان نىعماتۋلين مينيستردەن ەلدە قاشان كەڭ جولاقتى قولجەتىمدى ينتەرنەت بولاتىنىن سۇرادى.
– قاشان كەڭ جولاقتى قولجەتىمدى ينتەرنەت بولادى؟ وسى سۇراق نەدەن تۋىندادى دەسەك، جىل سايىن ءسىزدىڭ الدىڭىزدا بولعان مينيسترلەر دە پارلامەنتكە كەلىپ، 1 جىلعا نەمەسە 2 جىلعا شەگەرىپ كەلدى. 2020 جىلى ءبىرىنشى ۋادە بولدى. ءقازىر 2021 جىل. ءسىز ەندى 2022 جىل دەپ جىلجىتىپ باستاداڭىز. وسى ۋادەلەرىڭىزدەن قاشان ناتيجە بولادى، قاشان اياقتالادى؟!، – دەپ نۇرلان نىعماتۋلين ب. مۋسينگە قاراتا سۇراق قويدى.
ءمينيستردىڭ ايتۋىنشا، 2020 جىلدىڭ سوڭىنا دەيىن قۇرعان جوسپاردىڭ ىشىندە تەحنيكالىق جاعدايلارعا ساي 510 ەلدى مەكەندە ساپاسى تومەن ينتەرنەت بەرىلگەن. 2022 جىلدىڭ سوڭىنا دەيىن بۇل جەرلەردە ينتەرنەت ساپاسى جوعارىلايدى.
ءماجىلىس ءتوراعاسى ب. مۋسينگە بارلىق جوسپاردىڭ ورىندالۋىن سۇراپ، جاسالعان جۇمىستىڭ ناتيجەسىن كورسەتۋدى تالاپ ەتتى.
– جاس ءمينيسترسىز، قىزمەتكە كىرىسكەنىڭىزگە كوپ بولمادى. پارلامەنت ءسىزدى قولدادى. وسى جۇمىستاردان ءبىر ناتيجە شىعارىڭىزشى. ەلدەن، حالىقتان ۇيات ەمەس پە؟! بۇرىنعى مينيسترلەر بەس رەت ۋادە بەرگەن، ايتقان مەرزىمدى 5 رەت جىلجىتتى. بۇگىن 2022 جىل دەپ ايتىپ وتىرسىز. 2012 جىلدان باستاپ ەسەپتەسەك، 100 پايىز ينتەرنەتپەن قامتاماسىز ەتەمىز دەگەن. بۇل كوسموسقا بارىپ، مارسقا الىپ باراتىن جوبا ەمەسقوي. بۇگىندە ەۋروپانىڭ باسقا اۋىلدارىنا بارساڭ ينتەرنەتپەن تولىق قامتاماسىز ەتىلگەن. بىزدە ەشتەڭە جوق. ءوزىڭىز 1200 اۋىلدى مەكەندە ينتەرنەت جوعىن ايتىپ وتىرسىز. سوندىقتان 2022 جىلى ناتيجە كۇتەمىز. بىزدەن قانداي كومەك كەرەك، زاڭناما بويىنشا قولداۋعا دايىنبىز، – دەدى ن. نىعماتۋلين.
پىكىر قالدىرۋ