كونستيتۋسيالىق كەڭەس پرەزيدەنت ق.توقايەۆتىڭ ادۆوكاتتىق قىزمەتكە بايلانىستى جاڭا زاڭدى ەل كونستيتۋسياسىنا سايكەستىگى تۇرعىسىنان قاراۋ تۋرالى ءوتىنىشىن قابىلدادى. بۇل تۋرالى كونستيتۋسيالىق كەڭەستىڭ رەسمي سايتى حابارلادى.
"رەسپۋبليكانىڭ كونستيتۋسيالىق كەڭەسى قازاقستان رەسپۋبليكاسىنىڭ پرەزيدەنتى ق. ك. توقايەۆتىڭ 2021 جىلعى 8 ساۋىردە پارلامەنت قابىلداعان "قازاقستان رەسپۋبليكاسىنىڭ كەيبىر زاڭنامالىق اكتىلەرىنە ادۆوكاتتىق قىزمەت جانە زاڭ كومەگى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭىن قازاقستان رەسپۋبليكاسىنىڭ كونستيتۋسياسىنا سايكەستىگى تۇرعىسىنان قاراۋ تۋرالى ءوتىنىشىن كونستيتۋسيالىق ءىس جۇرگىزۋگە قابىلدادى.
"قازاقستان رەسپۋبليكاسىنىڭ كونستيتۋسيالىق كەڭەسى تۋرالى" كونستيتۋسيالىق زاڭعا سايكەس كونستيتۋسيالىق كەڭەستىڭ وتىرىسىنا ماتەريالدار دايىنداۋ جونىندەگى جۇمىس باستالدى، وندا اتالعان ءوتىنىش ءمانى بويىنشا قارالاتىن بولادى.
كونستيتۋسيالىق كەڭەس رەگلامەنتىنىڭ 5-2-تارماعىنا سايكەس اتالعان ماسەلەلەرگە ماماندانعان قۇقىق قورعاۋ، عىلىمي جانە وزگە دە ۇيىمدار مەن ازاماتتار كونستيتۋسيالىق كەڭەسكە ءوز قورىتىندىلارىن ە-mail: gulmira@ksrk.gov.kz جولداي الادى" دەلىنگەن اقپاراتتىق حابارلامادا.
پىكىر قالدىرۋ