الماتى وبلىسىنىڭ تالعار اۋداندىق سوتىندا اۋەجاي ماڭىنان جەردى زاڭسىز ساتقان ريەلتور مەن ەكس-شەنەۋنىكتەرگە قاتىستى سوت ۇكىمى شىقتى. 

ريەلتور مەن ەكس-شەنەۋنىكتەر قىزمەت بابىن اسىرا پايدالانىپ، الاياقتىق جاسادى دەپ ايىپتالدى. بۇرىنعى 3 شەنەۋنىككە 3 جىل باس بوستاندىعىنان ايىرۋ جازاسى كەسىلدى. قالعاندارى 2،5 جىلدان 4 جىلعا دەيىن سوتتالدى.

تالعار اۋداندىق سوتىنىڭ سۋدياسى ءىلياس مۇحادي ۇلى بۇرىنعى 5 شەنەۋنىك پەن ريەلتوردىڭ ىسىنە قاتىستى سوت ۇكىمىن وقىدى.

ۇكىم بويىنشا: 

• تالعار اۋداندىق جەر قاتىناستارى ءبولىمىنىڭ بۇرىنعى باستىعى رۋستام تۇرىسبەكوۆ كىنالى دەپ تانىلىپ، مەملەكەتتىك قىزمەتتەگى لاۋازىمداردى اتقارۋ قۇقىعىنان 7 جىلعا ايىرا وتىرىپ، ەڭ تومەنگى ءقاۋىپسىز كولونيادا 5،5 جىلىن وتكىزەتىن بولدى. قازاقستان تاۋەلسىزدىگىنىڭ 25 جىلدىعىنا ارنالعان راقىمشىلىققا بايلانىستى ونىڭ مەرزىمىنىڭ 1/4 قىسقارتىلدى. ناتيجەسىندە ول 4،1 جىلدى قاۋىپسىزدىگى شەكتەۋلى كولونيادا وتەۋى كەرەك بولادى. سوت ونى سوت زالىندا كۇزەتپەن ۇستاۋ تۋرالى شەشىم شىعاردى.
• تالعار وبلىسى جەر قاتىناستارى ءبولىمىنىڭ بۇرىنعى باستىعى قايرات التىنبەك ۇلى كىنالى دەپ تانىلدى. سوت ونى 6 جىل مەرزىمگە مەملەكەتتىك قىزمەتتەگى لاۋازىمداردى اتقارۋ قۇقىعىنان ايىرا وتىرىپ، قاۋىپسىزدىگى شەكتەۋلى كولونيادا 4 جىلىن وتكىزۋدى بۇيىردى. راقىمشىلىققا بايلانىستى ونىڭ مەرزىمى قىسقارىپ، كولونياداعى مەرزىمى 3 جىل دەپ تاعايىندالدى.
• ريەلتور نۇرايىم الدانىش 5 جىلعا باس بوستاندىعىنان ايىرىلىپ، قاۋىپسىزدىگى ورتاشا كولونياعا جىبەرىلەتىن بولدى. تاۋەلسىزدىكتىڭ 25 جىلدىعىنا ارنالعان راقىمشىلىققا بايلانىستى ونىڭ مەرزىمى 2،5 جىلعا قىسقاردى.

قالعان سوتتالۋشىلارعا باس بوستاندىعىن شەكتەۋ جازاسى تاعايىندالدى.

• جەر رەگيسترى عىلىمي-وندىرىستىك ورتالىعى تالعار وبلىستىق ءبولىمىنىڭ بۇرىنعى باستىعى جاراس ماشىمبايەۆقا 4 جىلعا باس بوستاندىعىن شەكتەۋ تۋرالى ۇكىم شىقتى. تاۋەلسىزدىكتىڭ 25 جىلدىعىنا ارنالعان راقىمشىلىققا بايلانىستى ونىڭ مەرزىمى 3 جىلعا دەيىن قىسقارتىلدى.
• بۇرىنعى جەر كاداسترى عىلىمي-وندىرىستىك ورتالىعى ايماقتىق ءبولىمى باستىعىنىڭ مىندەتىن اتقارۋشى مەدەۋ قالىبەكوۆكە دە 4 جىلعا باس بوستاندىعىن شەكتەۋ تۋرالى سوت ۇكىمى شىقتى. راقىمشىلىققا بايلانىستى ونىڭ مەرزىمى 3 جىلعا دەيىن قىسقاردى.
• باسقارمانىڭ جەرگە ورنالاستىرۋ سەكتورىنىڭ بۇرىنعى باستىعى مىندەتىن اتقارۋشى بەرىك ابدۋللايەۆقا 4 جىلعا باس بوستاندىعىن شەكتەۋ جازاسى تاعايىندالدى. راقىمشىلىقتىڭ ارقاسىندا ونىڭ مەرزىمى 3 جىلعا دەيىن قىسقاردى.

ايتا كەتەيىك، تەرگەۋ بارىسىندا ريەلتور نۇرايىم الدانىش قانا ءوز كىناسىن مويىنداماي، كىناسى قۇجاتپەن دالەلدەنبەگەنىن ايتقان. ال قالعان بارلىق ەكس-شەنەۋنىكتەر ءوز كىناسىن مويىنداعان.

ەسكە سالا كەتەيىك، 2019 جىلدىڭ 27 جەلتوقسانىڭدا "Bek Air" اۋە كومپانياسىنىڭ ۇشاعى اپاتقا ۇشىراپ، سالدارىنان 12 ادام قايتىس بولعان بولاتىن.