يزرايلدەگى ەۆرەي-پالەستين قاقتىعىسى ءورشي ءتۇسىپ، تەل-اۆيۆ قالاسى ماڭىنداعى لود قالاسىندا توتەنشە جاعداي جاريالاندى، دەپ جازادى BBC.

بۇۇ گازا سەكتورىنداعى پالەستينالىق سودىرلار مەن يزرايل اسكەري كۇشتەرى اراسىنداعى قاقتىعىس سالدارىنان ءولىم-جىتىمنىڭ كوبەيگەنىنە الاڭداۋشىلىق ءبىلدىرىپ، جانجالدىڭ "جاپپاي سوعىسقا" ۇلاسىپ كەتۋىنەن قاۋىپتەنەدى.

قاقتىعىس يزرايل پوليسياسى مەن يەرۋساليمدەگى پالەستينالىق دەمونسترانتتار اراسىنداعى بىرنەشە اپتاعا سوزىلعان شيەلەنىستەن تۋىنداعان. دەمونسترانتتاردىڭ الاڭعا شىعۋىنا بىرنەشە اراب وتباسى يەرۋساليمنەن كوشىرىلۋى مۇمكىن دەگەن اقپارات سەبەپ بولعان. پالەستينا ەۆرەيلەر مەن مۇسىلماندار ءۇشىن دە قاسيەتتى جەر.

يزرايل بيلىگىنىڭ مالىمەتىنشە، پالەستينا سودىرلارى 38 ساعات ىشىندە، نەگىزىنەن تەل-اۆيۆكە 1000-نان استام زىمىران اتقان. سەيسەنبىدە يزرايل تاراپىنان جاۋاپ رەتىندە اۋە سوققىسى جاسالىپ، ناتيجەسىندە گازادا ەكى كوپ پاتەرلى ءۇي قيراعان. حاماس ۇيىمى (گازانى باسقاراتىن سودىرلاردىڭ توبى) جاۋدىڭ تۇرعىن ءۇي مۇنارالارىنا شابۋىلداعانىنا اشۋلانعانىن مالىمدەگەن.

بۇۇ باس حاتشىسى انتونيۋ گۋتەرريش يزرايلدەگى زورلىق-زومبىلىققا الاڭداۋشىلىق ءبىلدىرىپ، ەكى تاراپتى تىنىشتىقتى قالپىنا كەلتىرۋگە كۇش سالۋعا شاقىردى.

يزرايل دەنساۋلىق ساقتاۋ مينيسترلىگى دۇيسەنبىدەن باستاپ گازا سەكتورىندا كەم دەگەندە 43 پالەستينالىق، ونىڭ ىشىندە 13 بالا قازا تاپقانىن حابارلادى.

اقش مەملەكەتتىك دەپارتامەنتىنىڭ وكىلى نەد پرايس ءيزرايلدىڭ ءوزىن قورعاۋعا قۇقىعى بار ەكەنىن، ءبىراق پالەستينا حالقىنىڭ دا قاۋىپسىزدىككە قۇقىعى بارىن ايتتى.