تاتارستان استاناسى قازان قالاسىنداعى مەكتەپتە بولعان اتىستان جاراقات العان بالالاردىڭ جاعدايى ءقازىر تۇراقتى. بۇل تۋرالى رەسپۋبليكا پرەزيدەنتىنىڭ باسپا ءسوز قىزمەتى حاتشىسى ليليا گاليموۆا حابارلادى.

تاراتىلعان اقپاراتقا ساي، قازانداعى №175 مەكتەپتە وق اتۋ كەزىندە زارداپ شەككەن جانە تاتارستاننىڭ رەسپۋبليكالىق بالالار كلينيكالىق اۋرۋحاناسىندا ەمدەلىپ جاتقان 14 بالانىڭ جاعدايى تۇراقتى، ولاردىڭ ومىرىنە ءقاۋىپ ءتونىپ تۇرعان جوق. 

ەلدىڭ دەنساۋلىق ساقتاۋ مينيسترلىگى سارسەنبىدە 5 بالا مەن 3 ەرەسەك ادام ماسكەۋدەگى فەدەرالدىق كلينيكالارعا قاجەتتى ەم الۋ ءۇشىن جەتكىزىلگەنىن حابارلادى. جەڭىل دارەجەدەگى باس ميى شايقالىپ، بەتى سىرىلعان 1 بالا تۇرعىلىقتى جەرى بويىنشا دارىگەرلەردىڭ قاداعالاۋىمەن اۋرۋحانادان شىعارىلعان. ال 14 بالا تاتارستاننىڭ رەسپۋبليكالىق بالالار كلينيكالىق اۋرۋحاناسىندا ەم قابىلداۋدا.

ەسكە سالا كەتەيىك، قازانداعى دجاۋداتا فايزي كوشەسىندەگى مەكتەپ 19 جاستاعى ءجاسوسپىرىم يلناز گالياۆييەۆ قارۋمەن شابۋىل جاساپ، مەكتەپتىڭ  كىرەبەرىسىندە قولدان جاسالعان جارىلعىش زاتتى ىسكە قوسقان. سونىڭ سالدارىنان ەكى ءمۇعالىم، جەتى وقۋشى قازا تاۋىپ، 21 ادام جاراقات العان.

يلناز گالياۆييەۆ سوتتا ءوز كىناسىن تولىعىمەن مويىندادى. ول قىلمىستىق كودەكستىڭ 105-بابى "ادام ءولتىرۋ" فاكتىسى بويىنشا ايىپتالۋدا. تەرگەۋ جالعاسىپ جاتىر.