قاراعاندى وبلىسى ساتبايەۆ قالاسىنداعى جاپپاي تارتىپسىزدىك ءىسى بويىنشا سوت 54 ادامعا ۇكىم شىعاردى.  

بۇگىن قاراعاندى ​​وبلىسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتىنىڭ سۋدياسى كەنجەباي ىسقاقبايەۆ سوت ۇكىمىن جاريالادى.

"سوت 9 ايىپتالۋشىنى 3 جىلعا باس بوستاندىعىنان ايىرۋعا ۇكىم شىعاردى. ولار جازاسىن ورتاشا جانە توتەنشە قاۋىپسىزدىك قاج مەكەمەسىندە وتەيدى. ال 44 ايىپتالۋشىنى شارتتى تۇردە 4 جىلعا باس بوستاندىعىنان ايىردى. تاعى 2 ادامدى شارتتى تۇردە 1،5 جىلعا سوتتادى" دەلىنگەن حابارلامادا.

سوت بارىسىندا سوتتالۋشىلار جەرگىلىكتى پوليسيا بولىمىنە جانە پەدوفيلدىڭ كورشىلەرىنە كەلتىرىلگەن ماتەريالدىق شىعىندى وتەپ ۇلگەرگەنى بەلگىلى بولدى. ءتارتىپ ساقشىلارىنىڭ بۇلىنگەن اۆتوكولىكتەرى 26 ميلليون تەڭگەگە باعالاندى.

ەسكە سالا كەتەيىك،  ساتبايەۆ قالاسىندا 2020 جىلدىڭ 23-ىنەن 24 شىلدەسىنە قاراعان ءتۇنى بالا ۇرلانىپ، زورلىق-زومبىلىق كورگەنى حابارلانعان. كەيىن قالادا جاپپاي تارتىپسىزدىك باستالىپ، ساتبايەۆ پەن جەزقازعان قالالارىنىڭ تۇرعىندارى جينالىپ كۇدىكتىنى وزدەرى جازالاماق بولعان. ولار الاڭعا جينالىپ پوليسيا وكىلدەرىنە قارسى شىققان.

اتالعان وقيعا قاتىسۋشىلارىنا قىلمىستىق كودەكستىڭ 272-بابى 1-2 بولىكتەرى (جاپپاي تارتىپسىزدىكتەردى ۇيىمداستىرۋ جانە قاتىسۋ) جانە 380-باپتىڭ 1-بولىگى (مەملەكەتتىك قىزمەتكەرگە كۇش قولدانۋ) بويىنشا ايىپ تاعىلعان بولاتىن. بارلىق سوتتالۋشىلار پروكۋرورلارمەن پروسەسسۋالدىق كەلىسىم جاساسىپ، كىناسىن مويىنداعان.