ءبىلىم جانە عىلىم ءمينيسترى اسحات ايماعامبەتوۆ ستيپەنديا تولەۋ تارتىبىنە ەنگىزىلگەلى جاتقان وزگەرىستەر تۋرالى ايتتى.

–  ەندى ستۋدەنتتەردىڭ، ماگيسترانتتار مەن دوكتورانتتاردىڭ ستيپەندياسى تىكەلەي ولاردىڭ كارتاسىنا تۇسەدى. ياعني، 30 جىلدا شاكىرتاقى ەڭ ءبىرىنشى جوو-لارعا اۋدارىلاتىن. بۇدان بىلاي جوعارى وقۋ ورىندارى ستۋدەنتتەردىڭ وقۋ ۇلگەرىمىنە قاراپ ستيپەنديا تولەيدى. ءبىز وسى تۇستا كوپتەگەن تاۋەكەل بارىن بايقادىق. جاڭا جۇيەگە تولىعىمەن شىلدە ايىندا كوشۋ جوسپاردا بار. بۇل ستيپەنديانىڭ العاشقى قادامى، – دەدى ول.

ايماعامبەتوۆ اتاپ وتكەندەي، ءقازىر ءۇش قازاقستاندىق جوو پيلوتتىق رەجيمدە وسىنداي تولەم جۇيەسى بويىنشا جۇمىس ىستەيدى، تاعى 23 ءبىلىم بەرۋ مەكەمەسى وسىنداي جۇيەنى ەنگىزۋدى جوسپارلاپ وتىر.

ءمينيستردىڭ ورىنباسارى بيبىگۇل اسىلوۆا ستيپەنديانى تولەۋ سحەماسىن ءتۇسىندىردى.

– ءبىرىنشى كەزەڭدە قارجى ورتالىعى پيلوتتىق رەجيمدە جوعارى جانە جوو-دان كەيىنگى ۇيىمدارمەن كەلىسىم جۇرگىزەدى. كەيىن جوو اقپاراتتىق جۇيەدە گرانتتاعى ستۋدەنتتەر ءتىزىمىن، ولاردىڭ وقۋ ۇلگەرىمى، ستاتۋسى تۋرالى اقپارات بەرەدى. قارجى ورتالىعى بۇل مالىمەتتەردى مەملەكەتتىك ورگانداردىڭ دەرەكتەر بازاسىمەن سالىستىرادى. وسىنىڭ ءبارى اياقتالعاننان كەيىن اقپاراتتىق جۇيە ستيپەنديا مولشەرىن اۆتوماتتى تۇردە ەسەپتەپ شىعارادى. شاكىرتاقى ستۋدەنتتەردىڭ كارتاسىنا ەكىنشى دەڭگەيلى بانكتەر ارقىلى اۋدارىلادى، – دەدى اسىلوۆا.