ماسكەۋ حالىقارالىق  قاۋىمداستىققا اركتيكاداعى ماسەلەلەر تۋرالى ەسكەرتۋ جاسادى. "بۇل – قىرعي-قاباق سوعىس اياقتالعاننان كەيىنگى ستراتەگيالىق باسەكەلەستىكتە كۇتپەگەن دەڭگەي" دەپ جازدى The Telegraph باسىلىمى.

ماسكەۋ جاقىندا اسكەري كۇشتەرىن كوبەيتىپ، مۇز ەرىگەن كەزدە اشىلعان مينەرالدى رەسۋرستار مەن جاڭا تاسىمالداۋ مارشرۋتتارىن پايدالانۋعا ۇمتىلدى.

اقش، بىرنەشە سكانديناۆيالىق ەلدەر جانە جۇڭگو سولتۇستىكتە وزدەرىنىڭ مۇددەلەرىن قورعاۋ ءۇشىن قادامدار جاسادى.

اقپان ايىندا اقش ستراتەگيالىق بومبالاۋشى ۇشاقتاردى نورۆەگياعا جىبەردى. بۇل وقيعا ماسكەۋدى دۇرلىكتىرىپ، ارتىنشا ناتو رەسەيگە "قوقان-لوقى جاسادى" دەگەن ايىپتاۋلار پايدا بولدى.

وتكەن جىلى ۇلىبريتانيانىڭ كورولدىك اسكەري-تەڭىز كۇشتەرىنىڭ سوعىس كەمەلەرى مەن جويعىشتارى كوپمەملەكەتتىك تاپسىرما توبىن ايماقتاعى تەڭىز ارقىلى باسقارعان.

– بۇل – ءبىزدىڭ تەرريتوريامىز، بۇل ءبىزدىڭ جەرىمىز ەكەندىگى ۇزاق ۋاقىت بويى بارىنە ايقىن، – دەدى رەسەي سىرتقى ىستەر ءمينيسترى سەرگەي لاۆروۆ دۇيسەنبىدە ماسكەۋدە وتكەن باسپا ءسوز كونفەرەنسياسىندا.

– ءبىز ءوزىمىزدىڭ اركتيكالىق جاعالاۋىمىزدىڭ قاۋىپسىزدىگىن قامتاماسىز ەتۋگە جاۋاپتىمىز. تاعى ءبىر رەت اتاپ وتۋگە رۇقسات ەتىڭىز: بۇل – ءبىزدىڭ جەرىمىز بەن تەڭىزىمىز، – دەدى ول.

تۇسىنىكتەمەلەردە اركتيكا كەڭەسىنىڭ بەيسەنبىدە رەيكياۆيكتە وتەتىن وتىرىسىندا اركتيكا مەملەكەتتەرىنىڭ سىرتقى ىستەر مينيسترلەرى قاتىساتىن كەلىسسوزدەر تۋرالى ايتىلادى.

قۇرامىنا كانادا، دانيا، فينليانديا، يسلانديا، نورۆەگيا، شۆەسيا جانە اقش كىرەتىن ۇيىمعا رەسەي ەكى جىل ءتوراعالىق ەتپەك.