پرەزيدەنت ق.توقايەۆ تۇركىستان وبلىسىنىڭ اكىمى ءومىرزاق شوكەيەۆتى قابىلدادى. قازاقستان پرەزيدەنتىنە تۇركىستان وبلىسىنىڭ الەۋمەتتىك-ەكونوميكالىق دامۋى، حالىقتىڭ ءال-اۋقاتىن جاقسارتۋعا قاتىستى قابىلدانعان شارالار، وڭىردەگى كوروناۆيرۋس ىندەتىنە قارسى اتقارىلىپ جاتقان جۇمىستار جايىندا باياندالدى. بۇل تۋرالى اقوردا سايتى حابارلادى.
اقوردا باسپا ءسوز قىزمەتىنىڭ مالىمەتىنشە، قاسىم-جومارت توقايەۆقا ءومىرزاق شوكەيەۆ وبلىستا كوۆيد-مەنەدجمەنت بويىنشا جۇيەلى جۇمىس جاسالعانىن، سانيتارلىق-ەپيدەميالىق ءتارتىپتىڭ قاتاڭ ساقتالعانىن، حالىققا ەكپە ەگۋ ءىسىنىڭ قارقىندى ءجۇرىپ جاتقانىن ايتقان.
"جالپى تۇركىستان وبلىسى بويىنشا 1 ميلليون ادامعا ەكپە ەگىلۋى كەرەك بولسا، بۇگىندە 200 مىڭ ادامعا ۆاكسينا سالىنعان. ايماقتاعى جۇقپالى اۋرۋلار اۋرۋحانالارىنداعى توسەك-ورىندار مەن دارى-دارمەك قورى جەتكىلىكتى، قاجەتتى قۇرالدارمەن جابدىقتالعان. ءوڭىر باسشىسىنىڭ ايتۋىنشا، ءقازىر وبلىس «جاسىل ايماقتا»، سوعان سايكەس كەيبىر شەكتەۋلەر الىنىپ جاتىر.
بيىل تۇركىستان وبلىسىنىڭ قۇرىلعانىنا 3 جىل تولادى. مەملەكەت باسشىسىنا وسى ارالىقتا اتقارىلعان جۇمىستار مەن وڭىردەگى وزگەرىستەر تۋرالى ايتىلدى. ءومىرزاق شوكەيەۆ وبلىستىڭ جالپى ىشكى ءونىمى 41 پايىزعا وسكەنىن، ينۆەستيسيا 2،4 ەسە ارتقانىن، قۇرىلىس سالاسىندا ءىرى جوبالار ىسكە اسقانىن، اۋىل شارۋاشىلىعى، شاعىن جانە ورتا بيزنەس بويىنشا وڭ كورسەتكىش بار ەكەنىن اتاپ ءوتتى" دەلىنگەن اقپاراتتىق حابارلامادا.
كەزدەسۋ بارىسىندا پرەزيدەنت وبلىس اكىمىنە ۇكىمەتپەن بىرلەسىپ تۇركىستان وبلىسىن دامىتۋدىڭ 2018-2024 جىلدارعا ارنالعان كەشەندى جوسپارىن قايتا جاڭارتۋدى تاپسىرعان.
پىكىر قالدىرۋ