اقش پالاتا سپيكەرى نەنسي پەلوسي قىتايداعى ادام قۇقىعىنىڭ بۇزىلۋىنا بايلانىستى كەلەسى جىلى بەيجىڭدە وتەتىن قىسقى وليمپيادا ويىندارىنا ديپلوماتيالىق بويكوت جاريالاۋعا شاقىردى.
پەلوسي قىسقى وليمپياداعا بارلىق مەملەكەت باسشىلارى قاتىسپاۋى كەرەك ەكەنىن ايتتى.
سپيكەر قىتايدا ەشنارسە بولماعان سياقتى وليمپيادا ويىندارىنىڭ وتە بەرۋى دۇرىس ەمەس دەپ ەسەپتەيدى.
بۇۇ جانە حالىقارالىق ادام قۇقىعى ۇيىمدارى قىتايدىڭ سولتۇستىك-باتىسىنداعى ۇلكەن ايماق شىڭجاڭدا بەيجىڭ ميلليوننان استام قازاق جانە ۇيعىر مۇسىلماندارىن قاماپ وتىرعانىن ايتادى.
ولاردىڭ اقپاراتىنا سايكەس، شىڭجاڭدا ۇستالعانداردىڭ كوپشىلىگى "قايتا تاربيەلەۋ" مەكەمەلەرى دەپ اتالاتىن تۇرمە ءتارىزدى لاگەرلەرگە جىبەرىلگەن. ولار بەلگىسىز ۋاقىتقا قامالادى.
دەموكرات پەلوسي ەكى پارتيالى كونگرەسستەگى تىڭداۋ بارىسىندا بۇكىل الەمنىڭ مەملەكەت باسشىلارى اقپان ايىندا وتەتىن قىسقى وليمپيادا ويىندارىنا بويكوت جاريالاۋى كەرەك دەدى.
"مەملەكەت باسشىلارى قىتايعا بارماۋ ارقىلى جۇڭگو ۇكىمەتىن قۇرمەتتەمەيتىنىمىزدى كورسەتەيىك. مەملەكەت باسشىلارى قىتايدا بولىپ جاتقان گەنوسيدكە بايلانىستى بارۋى كەرەك. سىزدەر وزدەرىڭىزدىڭ ورىندارىڭىزدا قالاي وتىرسىزدار؟ ونسىز ادام قۇقىعى تۋرالى، الەمدەگى كەز كەلگەن جەردە مورالدىق بيلىك تۋرالى قالاي ايتا الاسىزدار؟" دەدى ول.
پەلوسي قىتايدىڭ شىڭجاڭ پروۆينسياسىنداعى قازاق، ۇيعىر سياقتى ازشىلىق قاۋىمعا جاسالعان قىسىمعا قاتىستى بويكوت جاريالاۋعا شاقىرعان سوڭعى امەريكالىق ساياساتكەر. بۇعان دەيىن مايك پومپەو جانە بايدەن اكىمشىلىگىندەگى بىرنەشە امەريكالىق ساياساتكەرلەر شىڭجاڭداعى ازشىلىقتارعا جاسالعان ساياساتتى "گەنوسيد" دەپ باعالاعان.
سونىمەن قاتار، اقش، كانادا، ۇلىبريتانيا، نيدەرلاندى سياقتى ەلدەر قىتايدىڭ باتىس بولىگىندەگى مۇسىلمان حالىقتارىنا جۇرگىزگەن ساياساتىن رەسمي تۇردە "گەنوسيد" دەپ اتادى. گەرمانيا، بەلگيا، شۆەسيا، جاڭا زەلانديا سياقتى كوپتەگەن ەلدەردىڭ پارلامەنتى ايماقتاعى پروبلەمانى "گەنوسيد" دەپ جاريالاۋدى كوتەردى.
جۇڭگو ۇكىمەتى شىڭجاڭداعى ەتنيكالىق ازشىلىق ايەلدەرىنە ءماجبۇرلى ستەريليزاسيا جۇرگىزدى جانە بالالاردى وتباسىلارىنان ءبولدى دەپ ايىپتالدى.
باستاپقىدا بەيجىڭ لاگەرلەردى جوققا شىعارعان. كەيىنىرەك ولاردى تەرروريزمگە قارسى قاجەتتى شارا دەپ جاريالادى. بەيجىڭ ادام قۇقىعىن بۇزۋ تۋرالى ايىپتاۋلاردى جوققا شىعارادى.
پىكىر قالدىرۋ