سەناتتىڭ بۇگىنگى وتكەن جالپى وتىرىسىندا سەناتور دينار نوكەتايەۆا مەكتەپتەگى كىتاپحاناشىلاردىڭ جالاقىسىن ارتتىرۋ ماسەلەسىن كوتەردى. دەپۋتتاتتىڭ ساۋالىنا ءبىلىم جانە عىلىم ءمينيسترى اسحات ايماعامبەتوۆ جاۋاپ بەردى. 

سەناتوردىڭ ايتۋىنشا، جالپى حالىققا قىزمەت كورسەتەتىن كىتاپحانا قىزمەتكەرلەرىنىڭ جالاقىسى 30-50 پايىزعا كوتەرىلگەن. ءبىراق مەكتەپتەگى كىتاپحاناشىلاردىڭ ەڭبەكاقىسى وزگەرىسسىز قالعان.

ءبىلىم جانە عىلىم ءمينيسترى بۇگىندە مەكتەپ كىتاپحانالارىندا 13،5 مىڭ ادام جۇمىس ىستەيتىنىن جانە ولاردىڭ بارلىعى ءبىلىم قىزمەتكەرلەرى بولىپ سانالاتىنىن اتاپ ءوتتى. سوندىقتان مادەنيەت سالاسىنداعى كىتاپحاناشىلاردىڭ جالاقىسىن ارتتىرۋ شارالارىنا ىلىنبەي قالعان. 

– ءبىلىم سالاسىندا قىزمەت ەتەتىن 13،5 مىڭ كىتاپحاناشىنىڭ جالاقىسى مادەنيەت سالاسىنداعى ارىپتەستەرىمەن سالىستىرعاندا الدەقايدا تومەن. ال جۇمىس مازمۇنى بىردەي جانە وزدەرىڭىز بىلەسىزدەر، اسىرەسە، شالعايداعى ەلدىمەكەندەردە جالعىز كىتاپحانا عانا جۇمىس ىستەيدى. ول وقۋشىلاردى عانا ەمەس، بارلىق تۇرعىندى كىتاپپەن قامتاماسىز ەتەدى، – دەدى اسحات ايماعامبەتوۆ.

ءمينيستردىڭ سوزىنشە، بۇگىندە ارنايى جۇمىس توبى قۇرىلعان. وعان ءبىلىم جانە عىلىم، ەڭبەك جانە حالىقتى الەۋمەتتىك قورعاۋ مينيسترلىگى مەن قارجى مينيسترلىگىنىڭ ماماندارى كىرەدى.