اعىلشىن ساراپشىلارى قىتايمەن جاپپاي سوعىس ءقاۋپىن ەسكەرتتى. ۇلىبريتانيانىڭ ءىرى سوعىس كەمەسى باستاعان توپ وڭتۇستىك جۇڭگو تەڭىزىنە قاراي جىلجىپ بارا جاتقاندا شۇعىل ەسكەرتۋ جاسالعان..

ۇلىبريتانيا كورولدىك اسكەري-تەڭىز كۇشتەرىنىڭ ەڭ ءىرى سوعىس كەمەسىمەن بىرگە شىققان اسكەري توپتىڭ وڭتۇستىك جۇڭگو تەڭىزىندەگى داۋلى ايماققا ءبىرىنشى رەت  جەدەل ورنالاسۋى بەيجىڭمەن شيەلەنىستى ءورشىتۋى مۇمكىن دەپ بولجانۋدا. 

ۇلىبريتانيانىڭ پورتسمۋت اسكەري-تەڭىز بازاسىنان جولعا شىققان 3 ميلليارد فۋنت ستەرلينگتىك اسكەري كەمەدە 1600 سارباز بار.

وڭتۇستىك جۇڭگو تەڭىزىندەگى بۇل وپەراسياعا بايلانىستى جۇڭگو تاراپى بىرنەشە رەت قاتاڭ ەسكەرتۋ جاريالادى.

جۇڭگو حالىق-ازاتتىق ارمياسى اسكەري-تەڭىز كۇشتەرى سوڭعى اپتالاردا داۋلى اۋماقتا اتىس جاتتىعۋلارىن كوبەيتتى.

جۇڭگو سىرتقى ىستەر مينيسترلىگىنىڭ وكىلى چجاو ليسزيان "جۇڭگو ءوزىنىڭ ۇلتتىق ەگەمەندىگى مەن قاۋىپسىزدىگىن ساقتاۋ ءۇشىن قاجەتتى شارالاردى قولدانۋدى جالعاستىرادى" دەپ مالىمدەدى.

جاقىندا امەريكالىق اسكەري كەمە "قىتايدىڭ سيشا تەرريتوريالىق سۋلارىنا كىردى" دەگەن اقپاراتتان كەيىن بەيجىڭ تاعى دا قاتاڭ ەسكەرتۋ جاريالاعان.

ۇلىبريتانيا سوعىس كەمەسى ايماققا ساپارعا اتتانعان كەزدە، اعىلشىن قورعانىس ءمينيسترى بەن ۋوللەس قىتايدىڭ تەڭىز تالاپتارىنىڭ كۇشەيىپ بارا جاتقانى تۋرالى ەسكەرتتى.

– ءبىز ءوزىمىزدىڭ قۇندىلىقتارىمىز بەن قۇقىقتارىمىزعا ءقاۋىپ تونگەن كەز كەلگەن جەردە، ءوز اۋلامىزدا عانا ەمەس، جاعالاۋلارىمىزدان الىس جەردە دە ادىلەت جاعىندا بولۋىمىز كەرەك. بۇل ورنالاستىرۋ ءبىزدىڭ ءوز كۇشىمىزگە يە ەكەنىمىزدى، ءبىراق وداقتاستارىمىزبەن ودان دا كۇشتى ەكەنىمىزدى كورسەتەدى، – دەدى ول.

الايدا ۇلىبريتانيا قورعانىس تاڭداۋ كوميتەتىنىڭ ءتوراعاسى توبياس ەللۆۋد اعىلشىن قورعانىس مينيسترلىگى وڭتۇستىك جۇڭگو تەڭىزىنە ءجۇزۋدىڭ قاتەرىن تولىق باعالامادى دەگەن پىكىردە.

– ءبىز قىتايدىڭ ستراتەگيالىق ىقپالىن العا جىلجىتقانىن كورىپ وتىرمىز جانە ءبىزدىڭ اسكەري-تەڭىز فلوتىمىز جۇڭگو باسىمدىلىق بەرگەن ايماقتارمەن باسەكەلەسە المايدى، – دەدى توبياس ەللۆۋد.

ۇلىبريتانيا يادرولىق قارۋسىزدانۋ كامپانياسى، سوعىستى توقتاتۋ كواليسياسى دەپۋتاتتارى جانە مادەنيەت قايراتكەرلەرى داۋلى ايماقتاعى شيەلەنىستىڭ ارتۋىنا الاڭداپ پرەمەر-مينيستر بوريس دجونسونعا حات جازعان.

"اقش-تىڭ جويعىش ۇشاقتارىمەن بىرگە ءىرى سوعىس كەمەسىن وڭتۇستىك جۇڭگو تەڭىزىنىڭ داۋلى سۋلارىنا جىبەرۋ قىتايمەن تەك قاقتىعىستارعا اكەلۋى مۇمكىن، ءتىپتى ودان ءارى ءورشۋى مۇمكىن. قاقتىعىس يادرولىق قارۋلى مەملەكەتپەن سوعىس ىقتيمالدىعىن جوعارىلاتادى. ءقازىر مىلتىق ديپلوماتياسىنىڭ ۋاقىتى ەمەس. ءبىز وتارلىق ادىلەتسىزدىك فاكتىلەرىمەن بەتپە-بەت كەلىپ، يمپەريالىق ميفتەردى دارىپتەۋدىڭ ورنىنا ىنتىماقتاستىقتىڭ جاڭا تاسىلدەرىن ىزدەۋىمىز كەرەك" دەيدى اعىلشىن دەپۋتاتتارى.