شارىن شاتقالىندا جوعالعان وقۋشى قىز تابىلدى. بۇل تۋرالى توتەنشە جاعدايلار مينيسترلىگىنىڭ رەسمي وكىلى تالعات ءۋالي حابارلادى.
– شارىن شاتقالى قىزمەتكەرلەرى شارىن وزەنىنىڭ بويىن جاعالاي جەر بەتىندە ىزدەۋ-قۇتقارۋ جۇمىستارىن جۇرگىزۋ بارىسىندا ساعات 09:34-تە 2010 جىلى دۇنيەگە كەلگەن قىزدى تاپتى. ول شارىن وزەنىنىڭ سول جاعالاۋىندا وقيعا بولعان جەردەن 3-4 شاقىرىم قاشىقتىقتا بولعان، – دەدى تالعات ءۋالي.
ونىڭ ايتۋىنشا، قازىرگى ۋاقىتتا رەسپۋبليكالىق جەدەل قۇتقارۋ وتريادى مەن الماتى وبلىستىق توتەنشە جاعدايلار دەپاراتامەنتىنىڭ جەدەل قۇتقارۋ ءبولىمىنىڭ قۇتقارۋشىلارى دارىگەرگە دەيىنگى العاشقى مەديسينالىق كومەك كورسەتىپ جاتىر.
زارداپ شەككەن وقۋشى قىزعا مەديسينالىق كومەك كورسەتۋ ءۇشىن ونى "قازاۆياقۇتقارۋ" اق-نىڭ اۆياسيالىق تەحنيكاسىمەن الماتى قالاسى اۋرۋحانالارىنىڭ بىرىنە جەتكىزۋ ماسەلەسى شەشىلىپ جاتىر.
بۇعان دەيىن كەشە الماتى وبلىسىنىڭ شارىن شاتقالىندا سەل ءجۇرىپ، 2 ادام قازا تاۋىپ، 6 ادام زارداپ شەگىپ، 1 ادامنىڭ ءىز-تۇسسىز جوعالعانى حابارلانعان.
پىكىر قالدىرۋ