«Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك مەملەكەتتىك حاتشى قىرىمبەك كوشەربايەۆپەن بىرگە «الجير» مەموريالدى-مۇراجاي كەشەنىنە بارىپ، ەسكەرتكىش تاقتاعا گۇل شوعىن قويۋ راسىمىنە قاتىستى. بۇل تۋرالى ول Facebook جەلىسىندەگى ءوزىنىڭ پاراقشاسىندا جازدى. 

«قۇرمەتتى دوستار! بۇگىن – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى. وسىعان وراي مەملەكەتتىك حاتشى قىرىمبەك كوشەربايەۆپەن بىرگە «الجير» مەموريالدى-مۇراجاي كەشەنىنە بارىپ، ەسكەرتكىش تاقتاعا گۇل شوعىن قويۋ راسىمىنە قاتىستىم.

اتالعان مۇراجاي 2007 جىلى ەلباسىنىڭ پارمەنىمەن قۇرىلىپ، ونى ءوزى كەلىپ ارنايى اشقان بولاتىن. بۇل – قۋعىن-سۇرگىندە قۇربان بولعان قانشاما بوزداقتىڭ رۋحىنا جاسالعان تاعزىم.

30-شى جىلدارداعى الاپات اشتىق پەن 37ء-نىڭ قىرعىنى – ۇلت تاريحىنداعى ەڭ ءبىر قاسىرەتتى كەزەڭدەردىڭ ءبىرى. بۇل ناۋبەتتەردىڭ حالقىمىزعا تيگىزگەن زاردابى وراسان. قازاقتىڭ قانشاما بەتكەۇستار تۇلعالارى مەن وزىق ويلى زيالىلارى وسى زۇلماتتىڭ قۇربانىنا اينالدى. ولار ۇلتتىڭ ازاتتىعىن، وزگە ەلدەرمەن تەرەزەسى تەڭ ەل بولۋىن كوكسەگەن ەدى.

سوندىقتان دا مۇنداي وقيعالار بۇدان بىلاي قايتالانباۋى ءۇشىن ونى ۇدايى ەسكە الىپ، وتكەننەن تاعىلىم الىپ وتىرۋ ماڭىزدى.⠀

ەلىمىزدىڭ تۇڭعىش پرەزيدەنتى – ەلباسى، «Nur Otan» پارتياسىنىڭ ءتوراعاسى نۇرسۇلتان نازاربايەۆ 1997 جىلى ارنايى جارلىقپەن 31 مامىردى – ساياسي قۋعىن-سۇرگىن قۇرباندارىن ەسكە الۋ كۇنى ەتىپ بەلگىلەدى. سودان بەرى ەلىمىزدىڭ جەر-جەرىندە ساياسي قۋعىن-سۇرگىن جانە اشارشىلىق قۇرباندارىن ەسكە الۋعا ارنالعان ەسكەرتكىشتەر بوي كوتەردى، مۇراجايلار اشىلدى، كوپتەگەن زەرتتەۋلەر جۇرگىزىلدى. ءالى دە اشىلماعان اقتاڭداقتارىمىز قانشاما.

وسىعان وراي بىلتىر مەملەكەت باسشىسى قاسىم-جومارت توقايەۆتىڭ تاپسىرماسىمەن قۇرىلعان ساياسي قۋعىن-سۇرگىن قۇرباندارىن اقتاۋ جونىندەگى مەملەكەتتىك كوميسسيا بۇل ىسكە تىڭ سەرپىن بەرىپ وتىر. تاريحي ادىلدىكتى قالپىنا كەلتىرۋگە باعىتتالعان بۇل جۇمىسقا «Nur Otan» پارتياسى دا بەلسەندى اتسالىسۋدا.

دارقان دا دانا حالقىمىز الماعايىپ كەزەڭدەردى باستان كەشسە دە بەرەكە-بىرلىگىن جوعالتپادى، ەڭسەسىن تۇسىرمەدى. جەر اۋدارىلىپ، تاعدىر تالكەگىنە تۇسكەن وزگە جۇرتقا دا قامقورلىق تانىتىپ، پانا بولدى. كەزىندەگى الاش ارىستارىنىڭ اسىل ارماندارى ورىندالىپ، قازاقستان ءوز الدىنا دەربەس ەل، الەم تانىعان ىرگەلى مەملەكەتكە اينالدى. بۇگىندە ەلباسى قالىپتاستىرعان سارا جولدى ۇستانىپ، بەيبىتشىلىك پەن بەرەكەلى تىرلىكتى تۋ ەتۋ ارقىلى ەڭسەلى ەل رەتىندە تاۋەلسىزدىكتىڭ وتىز جىلدىعىنا قادام باسىپ وتىر. وسى وتىز جىلدىڭ ىشىندە ءبىز قانشا قيىندىق كەزدەسسە دە ولاردى اۋىزبىرشىلىكپەن ەڭسەرە بىلدىك. تورتكۇل دۇنيەمەن تەرەزەسى تەڭ مەملەكەت قۇردىق. توقسانىنشى جىلدارى نەبىر ساۋەگەيلەر قازاقستاندا قانتوگىستەر ورىن الادى دەپ بولجاپ ەدى. ولاردىڭ دەگەنى بولمادى. ەشقانداي قانتوگىسكە جول بەرمەدىك. ىنتىماعى جاراسقان، بىرلىگى بەكەم ەلگە اينالدىق.

ەندىگى ماقسات – بەرەكە-بىرلىگىمىزدى ارتتىرىپ، اعىمداعى قيىندىقتاردى ادەتتەگىدەي دانالىقپەن ەڭسەرىپ، تاۋەلسىزدىگىمىز بەن مەملەكەتتىلىگىمىزدى قاستەرلەپ، الەمدىك قاۋىمداستىقتا الار ورنىمىزدى ايشىقتاۋ، سونداي-اق، حالىقتىڭ ءال-اۋقاتىن كوتەرىپ، ەكونوميكامىزدى ىلگەرىلەتۋ. بۇل ءۇشىن ەڭ الدىمەن اۋىزبىرشىلىك كەرەك. وسى جولدا بارىمىزدى باعالاپ، جەتىستىكتەرىمىزدى ەسەلەۋ – بارىمىزگە ورتاق پارىز.

قاشاندا وتكەنىن ۇمىتپاي، تاريحتان ءتيىستى ساباق الىپ، العا قاراي بايىپپەن قادام باساتىن ەلدەردىڭ كەلەشەگى كەمەل بولماق. ەندەشە، وركەنيەتتىڭ ۇلى كوشىنە ىلەسكەن ەلىمىزدىڭ ءاردايىم تۇعىرى نىق، بولاشاعى جارقىن بولسىن.

ەلدىڭ ەرتەڭى ءۇشىن قۇربان بولعان اتا-بابالارىمىزدىڭ، الدىڭعى بۋىننىڭ رۋحى شات بولسىن»، – دەپ جازدى پارتيا ءتوراعاسىنىڭ ءبىرىنشى ورىنباسارى.