بۇگىن وتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق جاعداي قارالدى. دەنساۋلىق ساقتاۋ ءمينيسترى الەكسەي سوي حالىقتى ۆاكسينالاۋ بارىسى مەن قازىرگى جاعداي تۋرالى باياندادى.

ونىڭ مالىمەتىنشە، قازاقستاندا سانيتارلىق-ەپيدەميولوگيالىق جاعدايدىڭ جاقسارعانى بايقالادى. قازاقستان COVID-19 تارالۋ قارقىنى بويىنشا "سارى" ايماقتان "جاسىل" ايماققا وتكەن.

"ءبىر اپتا ىشىندە سىرقاتتانۋشىلىق دەڭگەيى 30%-عا، ۆيرۋستىڭ رەپرودۋكتيۆتىك يندەكسى 0،84-كە دەيىن، ينفەكسيالىق توسەك-ورىنداردىڭ جۇكتەلۋى 24%-عا دەيىن، رەانيماسيالىق توسەك-ورىنداردىڭ جۇكتەلۋى 21%-عا دەيىن تومەندەدى. "قىزىل ايماقتا" نۇر-سۇلتان قالاسى، "سارى ايماقتا" – 6 ءوڭىر: الماتى قالاسى، اتىراۋ، پاۆلودار، باتىس قازاقستان، اقمولا جانە قاراعاندى وبلىستارى ورنالاسقان. قالعان 10 ءوڭىر – "جاسىل ايماقتا". بۇگىنگى تاڭدا 2،4 ملن-عا جۋىق ادام ۆاكسينانىڭ ءبىرىنشى كومپونەنتىن، 1،3 ملن-عا جۋىق ادام ەكىنشى كومپونەنتىن العان" دەلىنگەن اقپاراتتىق حابارلامادا.