پرەمەر-مينيستر اسقار ءماميننىڭ توراعالىعىمەن وتكەن ۇكىمەتتىڭ سەلەكتورلىق وتىرىسىندا قۇرىلىس ماتەريالدارىنا باعا بەلگىلەۋ ماسەلەسى قارالدى، دەپ جازادى ۇكىمەتتىڭ باسپا ءسوز قىزمەتى.
ۇلتتىق ستاتيستيكا بيۋروسىنىڭ دەرەكتەرى بويىنشا 2021 جىلعى قاڭتار-مامىر ايلارىندا باستاپقى تۇرعىن ءۇي باعاسى 8%-عا، ەكىنشى قايتالاما تۇرعىن ءۇي باعاسى 13%-عا وسكەن. وتاندىق قۇرىلىس ماتەريالدارى باعاسىنىڭ ءوسىمى بيىلعى قاڭتار-ساۋىردە 16% قۇراعان.
ۇكىمەت ىشكى نارىق 50 پايىزىن عانا قامتاماسىز ەتەتىن ارماتۋرا، شىنى سياقتى يمپورتقا تاۋەلدى ماتەريالدار باعاسىنىڭ اسا كوپ ءوسۋىن ەلەكتر ەنەرگياسىنىڭ، جانار-جاعارماي مەن ماگيسترالدىق تەمىرجول جەلىسى قىزمەتىنىڭ قىمباتتاۋىمەن بايلانىستىرادى.
سونداي-اق تۇرعىن-ۇيگە سۇرانىستىڭ ارتۋى دا قىمباتشىلىققا اسەر ەتكەن. ۇلتتىق ستاتيستيكا بيۋروسىنىڭ دەرەكتەرى بويىنشا جىل باسىنان بەرى جاسالعان كەلىسىمدەر سانى وتكەن جىلعىمەن سالىستىرعاندا 2،5 ەسەگە ارتقان.
– قۇرىلىستىڭ جوعارى قارقىنى قۇرىلىستاعى بارلىق شىعىنداردىڭ ۇلەسى شامامەن 50%-دى قۇرايتىن قۇرىلىس ماتەريالدارىنا قاجەتتىلىكتى ۇلعايتادى. وسىعان وراي باعانىڭ نەگىزسىز وسۋىنە جول بەرمەۋ جانە نارىقتا قاتاڭ باقىلاۋدى قامتاماسىز ەتۋ بويىنشا شۇعىل شارالار قابىلداۋ وتە ماڭىزدى، – دەگەن اسقار مامين باسەكەلەستىكتى قورعاۋ جانە دامىتۋ اگەنتتىگىنە يندۋستريا جانە ينفراقۇرىلىمدىق دامۋ مينيسترلىگىمەن جانە اكىمدىكتەرمەن بىرلەسىپ، جوسىقسىز وندىرۋشىلەر مەن ءونىمدى جەتكىزۋشىلەرگە قاتىستى قاتاڭ شارالار قابىلداۋدى تاپسىردى.
"پرەمەر-مينيستر يندۋستريا جانە ينفراقۇرىلىمدىق دامۋ مينيسترلىگىنە «اتامەكەن» ۇكپ-مەن بىرلەسىپ، قۇرىلىس سالۋشىلار مەن قۇرىلىس ماتەريالدارىن وندىرۋشىلەر اراسىندا ۇزاق مەرزىمدى ساتىپ الۋ كەلىسىمشارتتارىن جاساۋ مۇمكىندىگىن پىسىقتاۋدى تاپسىردى. يندۋستريا جانە ينفراقۇرىلىمدىق دامۋ مينيسترلىگىنە اكىمدىكتەرمەن جانە "اتامەكەن" ۇكپ-مەن بىرلەسىپ، قۇرىلىس سالاسىندا يمپورت الماستىرۋ بويىنشا جوسپارلانعان جوبالاردى ۋاقىتىندا ىسكە قوسۋدى قامتاماسىز ەتۋ تاپسىرىلدى" دەلىنگەن اقپاراتتىق حابارلامادا.
قازاقستاندا سوڭعى ەكى-ۇش اپتادا قۇرىلىس ماتەريالدارى، ونىڭ ىشىندە تەمىر، سەمەنت باعاسى ايتارلىقتاي قىمباتتاعان. قىمباتشىلىق وزگە دە تاۋارلارعا اسەر ەتىپ، قۇرىلىس نارىعىنداعى كوپتەگەن تاۋار تۇرلەرىنىڭ باعاسى وسكەن بولاتىن.
پىكىر قالدىرۋ