دەنساۋلىق ساقتاۋ ءمينيسترى الەكسەي سوي ۇكىمەت وتىرىسىندا ەلدەگى ەپيدەميولوگيالىق جاعدايدى مالىمدەدى. 

ءمينيستردىڭ ايتۋىنشا، ەلدە سانيتارلىق-ەپيدەميولوگيالىق جاعداي تۇراقتانعانى بايقالادى. قازاقستان كوروناۆيرۋستىڭ تارالۋ ءقاۋپى بويىنشا "سارى" ايماقتان "جاسىل" ايماققا وتكەن.

– ءبىر اپتا ىشىندە سىرقاتتانۋشىلىق دەڭگەيى 30%-عا، ۆيرۋستىڭ رەپرودۋكتيۆتىك يندەكسى 0،84-كە دەيىن، ينفەكسيالىق توسەك-ورىنداردىڭ جۇكتەلۋى 24%-عا دەيىن، رەانيماسيالىق توسەك-ورىنداردىڭ جۇكتەلۋى 21%-عا دەيىن تومەندەدى.

"قىزىل" ايماقتا نۇر-سۇلتان قالاسى، "سارى" ايماقتا – 6 ءوڭىر: الماتى قالاسى، اتىراۋ، پاۆلودار، باتىس قازاقستان، اقمولا جانە قاراعاندى وبلىستارى ورنالاسقان. قالعان 10 ءوڭىر – "جاسىل" ايماقتا، – دەدى سوي.

ول بۇگىنگى تاڭدا ۆاكسينانىڭ  ءبىرىنشى كومپونەنتىن – 2،4 ملن-عا جۋىق ادام،  ەكىنشى كومپونەنتتى  – 1،3 ملن-عا جۋىق ادام سالدىرعانىن حابارلادى.