پرەزيدەنت قاسىم-جومارت توقايەۆ پرەمەر-مينيستر اسقار ءماميندى قابىلدادى. ۇكىمەت باسشىسى توقايەۆقا بيىلعى قاڭتار-مامىر ايلارىنداعى الەۋمەتتىك-ەكونوميكالىق دامۋ قورىتىندىلارى مەن ەلدەگى سانيتارلىق-ەپيدەميولوگيالىق احۋالدى ايتتى. بۇل تۋرالى اقوردا سايتى حابارلادى.

سايت مالىمەتىنشە، ۇكىمەت باسشىسى ەلدەگى سانيتارلىق-ەپيدەميولوگيالىق احۋالدىڭ جاقسارعانىن ايتىپ، Covid-19 ىندەتىنىڭ تارالۋى بويىنشا قازاقستان "سارى" ايماقتان "جاسىل" ايماققا وتكەنىن جەتكىزگەن. ءبىر اپتا ىشىندە ىندەت جۇقتىرۋ دەڭگەيى 30 پايىزعا ازايىپ، كوروناۆيرۋستىڭ تارالۋ يندەكسى 0،84-كە دەيىن تومەندەگەن. جۇقپالى اۋرۋلار بولىمدەرىنىڭ 24 پايىزىندا، جانساقتاۋ بولىمدەرىنىڭ 21 پايىزىندا ناۋقاستار ەم قابىلداپ جاتىر. 

نۇر-سۇلتان قالاسى "قىزىل" ايماقتا، الماتى قالاسى، اتىراۋ، پاۆلودار، باتىس قازاقستان، اقمولا جانە قاراعاندى وبلىستارى "سارى" ايماقتا. قالعان 10 وبلىس – "جاسىل" ايماقتا.

قازىرگى تاڭدا 2،4 ملن ادام ەكپەنىڭ ءبىرىنشى كومپونەنتىن الدى، 1،3 ميلليونعا جۋىق ادامعا ەكپەنىڭ ەكىنشى كومپونەنتى سالىنعان.

مەملەكەت باسشىسى تۇرعىندارعا ۆاكسينا سالۋ قارقىنىن باسەڭدەتپەۋدىڭ جانە ەپيدەمياعا قارسى شارالاردى جالعاستىرۋدىڭ ماڭىزدى ەكەنىن اتاپ وتكەن.

كەزدەسۋ قورىتىندىسى بويىنشا پرەزيدەنت الەۋمەتتىك ماڭىزى بار ازىق-تۇلىك تاۋارلارىنىڭ باعاسىن ۇستاپ تۇرۋ، قۇرىلىس ماتەريالدارىنىڭ باعاسىن رەتتەۋ، سىرتقى جانە ىشكى ينۆەستيسيا كولەمىن ارتتىرۋ، وڭدەۋ سەكتورىن دامىتىپ، ءوسىمىن قامتاماسىز ەتۋ ارقىلى ەكونوميكانىڭ قۇرىلىمدارىن ءارتاراپتاندىرۋ جونىندەگى شارالاردى جۇزەگە اسىرۋعا باسا ءمان بەرۋدى تاپسىردى.