ءماجىلىستىڭ جالپى وتىرىسىندا دەپۋتات داريعا نازاربايەۆا پرەمەر-مينيستر اسقار مامينگە ەكى بىردەي دەپۋتاتتىق ساۋال جولدادى.

نازاربايەۆا العاشقى ساۋالىندا جەكەمەنشىك بالاباقشا ماماندارىنىڭ جالاقىسىنا قاتىستى ماسەلە كوتەردى.

دەپۋتاتتار بۇعان دەيىن مەكتەپكە دەيىنگى جەكەمەنشىك ءبىلىم بەرۋ ۇيىمدارىنا مەملەكەتتىك تاپسىرىسپەن قارجى ءبولۋ ماسەلەسىنە نازار اۋدارعان. سول كەزدە ۇكىمەت جەكەمەنشىك بالاباقشالاردى قولداۋ ماقساتىندا سالىق تولەۋدەن بوساتۋ، جالاقىعا ۇستەماقى تولەۋ سياقتى ءتيىمدى شارالاردىڭ قولعا الىنعانىن مالىمدەگەن. ال بيىل كەيبىر وبلىستار رەسپۋبليكالىق بيۋدجەتتەن قوسىمشا قاراجات ءبولۋدى سۇراعان.

– الايدا رەسپۋبليكالىق بيۋدجەتتەن ءتيىستى نىسانالى ترانسفەرتتەر بولىنگەن جوق. جوعارىدا ايتىلعانداردىڭ نەگىزىندە كەلەسى سۇراقتارعا جاۋاپ بەرۋىڭىزدى سۇرايمىن. نەلىكتەن بۇل قارجىلاندىرۋ 2021 جىلعا ارنالعان رەسپۋبليكالىق بيۋدجەتتى ناقتىلاۋ كەزىندە ەسكەرىلمەدى؟ بيىل تۇركىستان جانە الماتى وبلىستارىنا قوسىمشا قاراجات ءبولۋ كوزدەلىپ وتىر ما؟، – دەدى دەپۋتات ساۋالىندا. 

سونداي-اق نازاربايەۆا شەتەلدىك ينۆەستورلارمەن جۇمىس ىستەۋ تەتىكتەرىن جەتىلدىرۋ قاجەتتىلىگى ماسەلەسىنە دە نازار اۋداردى. ايتۋىنشا، كەز كەلگەن مەملەكەت ينۆەستيسيالاردى بارىنشا كوپ تارتۋعا مۇددەلى. الايدا جاۋاپسىز ينۆەستورلار وسى جاعدايدى پايدالانىپ، ەنشىلەس كومپانيالاردان تاۋارلاردى، جۇمىستار مەن كورسەتىلەتىن قىزمەتتەردى جوعارى باعامەن ساتىپ الۋ ارقىلى ينۆەستيسيالاۋ كولەمىن جاساندى تۇردە كوپ ەتىپ كورسەتە سالادى.

وسىلايشا، دەپۋتات 2017 جىلداعى اناتوليي ءستاتيدىڭ ءىسىن مىسال رەتىندە كەلتىردى.

– 2017 جىلعى 6 ماۋسىمدا اعىلشىن سوتى، «اناتوليي ستاتي جالعان اعىلشىن Perkwood كومپانياسىن پايدالانا وتىرىپ، الاياقتىق جولمەن قازاقستان رەسپۋبليكاسىندا گاز وڭدەۋ زاۋىتىن سالۋ ءۇشىن جەتكىزىلگەن جابدىقتىڭ قۇنىن 100 ميلليون اقش دوللارىنان استام سوماعا  اسىرىپ جىبەرگەنىن" انىقتادى. جالعان باسقارۋ قىزمەتتەرىن  كورسەتىپ، 44 ميلليون اقش دوللارى كولەمىندە سىياقى تولەۋ جانە جوق  جابدىقتار ءۇشىن 72 ميلليون اقش دوللارى كولەمىندە تولەمدەر سياقتى باسقا دا الاياقتىق ارەكەتتەرىن كورسەتۋگە بولادى، – دەيدى ول.

ول تورەلىككە جۇگىنگەن كەزدە جاۋاپسىز ينۆەستورلار جۇمىس باعدارلامالارىندا جازىلعان وزدەرىنىڭ جالعان ينۆەستيسيالارى ءۇشىن سوتقا جۇگىنەتىنىن دە اتاپ ءوتتى. تورەلىك ينۆەستوردىڭ پايداسىنا شەشىم شىعارعان جاعدايدا، جاساندى كوتەرىڭكى سومالار ەلگە بورىشتىق اۋىرتپالىق تۇسىرەدى، مەملەكەت اكتيۆتەرى ءۇشىن وزگە دە  تەرىس تاۋەكەلدەر جاسايتىنىن جەتكىزدى.

دەپۋتات ينۆەستورلارمەن جۇمىستى ۇيىمداستىرۋ كەزىندە شىعىنداردى جاساندى ارتتىرۋعا جول بەرمەۋ ماقساتىندا ينۆەستيسيالىق مىندەتتەمەلەردى (جۇمىس باعدارلامالارىن) ورىنداۋدىڭ ناقتى جانە اشىق تەتىگىن بەلگىلەپ، ونى باقىلاۋدا ۇستاۋدى ۇسىندى.