بيىل الماتى كوللەدجدەرىنە وقۋعا ءتۇسۋ تالاپتارىنا وزگەرىس ەنگىزىلدى. بۇل تۋرالى قالالىق ءبىلىم باسقارماسىنىڭ تەحنيكالىق جانە كاسىپتىك ءبىلىم بەرۋ ءبولىمىنىڭ باسشىسى اسەت مۇحانبەتوۆ حابارلادى.

مۇنداعى جاڭالىق – ەمتيحانداردىڭ بولماۋى. تەك مەملەكەتتىك تاپسىرىس بويىنشا پەداگوگيكالىق، مەديسينالىق پەن شىعارماشىلىق ماماندىقتارىنا تۇسۋشىلەر ارنايى ەمتيحان تاپسىرادى.

ونىڭ ايتۋىنشا، مەملەكەتتىك تاپسىرىس تالاپكەردىڭ تاڭداۋى بويىنشا كوللەدجدەرگە ناقتى قابىلداۋ ناتيجەلەرى بويىنشا ورنالاسادى.

– مەملەكەتتىك تاپسىرىس بەلگىلى ءبىر ۇپاي جيناعان جانە باسەكەگە قابىلەتتى كوللەدجدەرگە بەرىلەدى. مەملەكەتتىك تاپسىرىس بويىنشا ورىن العىسى كەلەتىن تالاپكەرلەر تىزىمگە ەنگەن كوللەدجدەردى عانا تاڭداي الادى، – دەدى اسەت مۇحانبەتوۆ.

بىلتىر كوللەدجدەر قابىلداۋ ەمتيحاندارىن ءوز بەتىنشە وتكىزگەن بولسا، ەندى باسەكەلەستىك ورتاشا ۇپاي بويىنشا اۆتوماتتى رەجيمدە وتكىزىلەدى.

دەمەك جوو-نا ءتۇسۋ ءۇشىن مەديسينالىق، پەداگوگيكالىق پەن شىعارماشىلىق ماماندىقتاردان باسقا ۇبت سەرتيفيكاتى تالاپ ەتىلمەيدى.

سونىمەن قاتار ول بۇل شارالار مەملەكەتتىك تاپسىرىستى قابىلداۋ مەن ورنالاستىرۋ پروسەسىنىڭ اشىقتىعىن قامتاماسىز ەتۋگە، كوللەدجدەر اراسىنداعى باسەكەلەستىكتى كۇشەيتۋگە مۇمكىندىك بەرەتىنىن اتاپ ءوتتى.

بارلىق مەكتەپ تۇلەكتەرى ءبىلىم باسقارمالارىنىڭ اقپاراتتىق جۇيەلەرى ارقىلى كاسىبي دياگنوستيكادان ءوتۋ مۇمكىندىگى بار. ناتيجەسىندە تالاپكەر بەلگىلى ءبىر ماماندىقتى الۋعا ۇسىنىستار الادى، ۇسىنىلعان ماماندىقتاردىڭ كارتالارىمەن تانىسادى.

كاسىبي دياگنوستيكا قورىتىندىسى بويىنشا تالاپكەر 4 ماماندىق پەن 4 كوللەدج تاڭداي الادى.