ءماجىلىس ءتوراعاسى نۇرلان نىعماتۋلين ەلگە رەسمي ساپارمەن كەلگەن رەسەي فەدەراسياسى كەڭەسىنىڭ ءتورايىمى ۆالەنتينا ماتۆيەنكو باستاعان دەلەگاسيا وكىلدەرىمەن كەزدەستى، دەپ جازادى ءماجىلىستىڭ باسپا ءسوز قىزمەتى.

كەزدەسۋ بارىسىندا تاراپتار ەكى ەل اراسىنداعى پارلامەنتارالىق ىنتىماقتاستىقتى ودان ءارى نىعايتۋ ماسەلەلەرىن تالقىلاعان.

ءماجىلىس ءتوراعاسى اتاپ وتكەندەي، رەسەي قازاقستاننىڭ ستراتەگيالىق ارىپتەسى، سەنىمدى دوسى جانە تاتۋ كورشىسى. قوس مەملەكەتتى تامىرىن تەرەڭگە تارتقان كوپ عاسىرلىق تاريحي ورتاق تامىرلاستىق بىرىكتىرەدى.

سونداي-اق پالاتا سپيكەرى قوس مەملەكەت اراسىنداعى قارىم-قاتىناس قازاقستاننىڭ تۇڭعىش پرەزيدەنتى-ەلباسى نۇرسۇلتان نازاربايەۆ پەن رەسەي پرەزيدەنتى ۆلاديمير ءپۋتيننىڭ ءوزارا سىندارلى كەلىسىمدەرىنىڭ ارقاسىندا جوعارى دەڭگەيدە دامۋ جولىنا تۇسكەنىن، بۇگىندە مەملەكەت باسشىسى قاسىم-جومارت توقايەۆ ماسكەۋمەن ستراتەگيالىق سەرىكتەستىكتى ودان ءارى نىعايتۋعا زور كوڭىل بولەتىنىن اتاپ ءوتتى.

كەزدەسۋ بارىسىندا نۇرلان نىعماتۋلين مارتەبەلى مەيمانعا ەلدەگى زاڭ شىعارۋ قىزمەتىنىڭ جاڭالىقتارى تۋرالى، ساياسي، الەۋمەتتىك، ەكونوميكالىق رەفورمالار جانە ولاردى زاڭدىق دەڭگەيدە قامتاماسىز ەتۋ بارىسىنداعى جەتىستىكتەر جايىندا بايانداپ بەردى.

ءوز كەزەگىندە رەسەي فەدەراسياسى كەڭەسىنىڭ ءتورايىمى پاندەمياعا قاتىستى شەكتەۋلەردەن كەيىنگى العاشقى ساپارىن ارنايى قازاقستانننان باستاپ وتىرعانىن اتاپ ءوتتى.

ۆالەنتينا ماتۆيەنكو ەلدىڭ 30 جىلدىق مەرەيتويىن ءسوز ەتە كەلىپ، تاريحي ولشەممەن العاندا از عانا ۋاقىتتىڭ ىشىندە، ءبىزدىڭ مەملەكەتتىڭ  ەكونوميكاسى دامىعان، الەمدىك بەدەلى جوعارى، زاماناۋي دەموكراتيالىق ەلگە اينالعانىن، بۇل قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ ەرەن ەڭبەگىنىڭ ناتيجەسى ەكەنىن، قازىرگى ۋاقىتتا پرەزيدەنت قاسىم-جومارت توقايەۆتىڭ باسشىلىعىمەن تابىستى جالعاسىپ كەلە جاتقانىن باسا ايتتى.  

سونىمەن قاتار، ەكى ەل اراسىنداعى ءوزارا ءتيىمدى ىس-ارەكەتكە، ءوزارا قۇرمەتكە نەگىزدەلگەن بەرىك ىنتىماقتاستىق حالىقتارىمىزدىڭ يگىلىگى جولىندا الداعى ۋاقىتتا قارقىندى دامي بەرەتىنىنە توقتالدى. 

كەزدەسۋ يەلەرى پارلامەنتارالىق، سونىڭ ىشىندە، تمد پارلامەنتارالىق اسسامبلەياسى، ۇجىمدىق قاۋىپسىزدىك تۋرالى شارت پارلامەنتتىك اسسامبلەيالارى، ەۋروپاداعى قاۋىپسىزدىك جانە ىنتىماقتاستىق ۇيىمى، پارلامەنتارالىق وداق اياسىندا ىقپالداستىقتى تەرەڭدەتۋ جونىندە اڭگىمەلەدى.  

نۇرلان نىعماتۋلين مەن ۆالەنتينا ماتۆيەنكو پارلامەنتارالىق ديالوگ قازاقستان مەن رەسەي اراسىنداعى ءوزارا ىنتىماقتاستىقتى نىعايتۋعا سەرپىن بەرەتىنىنە نازار اۋداردى.