2021 جىلعى قاڭتار مەن ءساۋىر ارالىعىندا ەكسپورتتالعان كارتوپ، يمپورتتالعان كولەمنەن 2 ەسەدەن استام كوپ. بۇل تۋرالى بلوگەر كيريلل پاۆلوۆ پاراقشاسىندا حابارلادى.
بلوگەر كەدەن ستاتيستيكاسىنا ءۇڭىلىپ، 2021 جىلعى قاڭتار مەن ءساۋىر ارالىعىندا قازاقستان 5،5 ميلليون دوللارعا 68 820 توننا كارتوپ ەكسپورتتاعانىن، 6 ميلليون دوللارعا 28 764 توننا كارتوپ ەلگە اكەلىنگەنىن ايتادى.
تاۋاردىڭ باسىم بولىگى، ياعني 59 693 تونناسى وزبەكستانعا جونەلتىلگەن. بۇل ءۇشىن قازاقستانعا 4،5 ملن دوللار قاراجات تولەنگەن. سوندا كارتوپتىڭ ورتاشا باعاسى 32 تەڭگە بولىپ تۇر.
ال نەگىزگى يمپورتتاۋشى ەلدەر قاتارىندا پاكىستان (3،5 ملن تەڭگەگە 16 824 توننا تاۋار، باعاسى كەلىسىنە 90 تەڭگە)، يران (2،2 ملن تەڭگەگە 10 474 توننا، باعاسى كەلىسىنە 90 تەڭگە) بار.
جىل باسىنان بەرگى 4 ايدا ەكسپورتتالعان كارتوپ باعاسى 34،5 تەڭگە، يمپورتتالعان كارتوپ 90 تەڭگە بولعان.
قازاقستاندا سوڭعى ۋاقىتتا كارتوپ، ءسابىز سەكىلدى الەۋمەتتىك ماڭىزى بار ازىق-تۇلىك تاۋارلارىنىڭ باعاسى ايتارلىقتاي وسكەن. ۇكىمەت مۇنى بىلتىر ءونىمنىڭ از شىعۋىمەن ءتۇسىندىرىپ، وڭتۇستىك وڭىرلەردەگى العاشقى جيىن-تەرىن ناۋقانى باستالعان سوڭ باعا تۇراقتالاتىنىن ايتقان.
پىكىر قالدىرۋ