ءبىلىم جانە عىلىم ءمينيسترى اسحات ايماعامبەتوۆ ۇكىمەت وتىرىسىندا مەكتەپتەردەگى قاۋىپسىزدىك شارالارى تۋرالى ايتتى.

– ءقازىر ەلىمىزدىڭ بارلىق مەكتەپتەرى بەينەباقىلاۋ كامەرالارمەن 100% قامتاماسىز ەتىلدى. دەسەك تە، ءبىلىم مەن عىلىم جانە ىشكى ىستەر مينيسترلىكتەرىنىڭ بىرلەسىپ جۇرگىزگەن مونيتورينگى وسى كامەرالاردىڭ 55% عانا تالاپتارعا ساي ەكەنىن كورسەتتى. بۇل ماسەلەلەردى شەشۋ ءۇشىن جەرگىلىكتى بيۋدجەتتەردەن 1،4 ملرد تەڭگە قاراجات قاراستىرىلدى.

وسىعان بايلانىستى سولتۇستىك قازاقستان مەن شىعىس قازاقستان وبلىستارىندا بەينەباقىلاۋ جۇيەلەرى ماسەلەسى شەشىمىن تابادى. تۇركىستان، اتىراۋ، جامبىل وبلىستارىندا قاراجات جەتكىلىكسىز دەڭگەيدە قاراستىرىلعان. جەرگىلىكتى اكىمدىكتەرگە ءتيىستى قاراجات بولۋلەرىن سۇرايمىز، — دەدى مينيستر.

ايماعامبەتوۆتىڭ ايتۋىنشا، ءبىلىم بەرۋ ۇيىمدارىندا دابىل تۇيمەلەرىن ورناتۋ جۇمىستارى جۇزەگە اسۋدا. بۇگىنگى تاڭدا ولاردىڭ سانى – 648. بۇل ماسەلە تەك الماتى مەن نۇر-سۇلتان قالالارىندا تولىعىمەن شەشىلگەن.

– پروبلەمانى شەشۋ ءۇشىن جەرگىلىكتى بيۋدجەتتەن 980 ملن تەڭگە سوماسىندا قاراجات كوزدەلگەن. ءبىراق بۇل ءالى دە جەتكىلىكسىز. تۇركىستان، پاۆلودار، باتىس قازاقستان وبلىستارىندا قاراجات تولىق قاراستىرىلماعان. سونىمەن قاتار قالالاردا ورنالاسقان ءبىلىم بەرۋ ۇيىمدارىن ليسەنزيالانعان كۇزەتپەن قامتۋ قاجەت.

مامانداندىرىلعان كۇزەت قىزمەتى بۇگىنگى كۇنى قالا مەكتەپتەرىنىڭ 38%-ىندا ەنگىزىلگەن. جەرگىلىكتى اتقارۋشى ورگاندار قوسىمشا 828 ملن تەڭگە مولشەرىندە سوما ءبولدى. ءبىراق ءالى دە قوسىمشا قارجى ءبولۋ كەرەك. قاراجات 8 وڭىردە جەتكىلىكسىز: جامبىل، قوستاناي، پاۆلودار، تۇركىستان، قىزىلوردا، باتىس قازاقستان، ماڭعىستاۋ وبلىستارى مەن شىمكەنت قالاسىندا. بۇل ءبىلىم بەرۋ ۇيىمدارى بولعاننان كەيىن كۇزەت ءار جىل سايىن اۋىسا بەرمەۋ ءۇشىن ارنايى كۇزەت قىزمەتىمەن قول قويىلاتىن كەلىسىمشارتتارىن كەم دەگەندە 1-3 جىلعا دەيىن ۇزارتۋ مۇمكىندىگىن قارجى مينيسترلىگىنەن قاراستىرۋدى سۇراپ وتىرمىز، – دەپ اتاپ ءوتتى اسحات ايماعامبەتوۆ.