نۇر-سۇلتان اكىمى التاي كولگىنوۆ استانا كۇنىندە وتشاشۋ بولمايتىنىن مالىمدەدى. بۇل تۋرالى ول ورتالىق كوممۋنيكاسيالار الاڭىندا وتكەن قالانىڭ الەۋمەتتىك-ەكونوميكالىق دامۋىنا ارنالعان ەسەپ بەرۋ كەزدەسۋىندە ايتتى.
– قالا كۇنى – قالا تۇرعىندارى ءۇشىن ەرەكشە كۇن. ادامدار تويلاعىسى كەلەدى، اسىرەسە كوبىسى ونى كۇتەدى. ءبىراق ەپيدجاعدايعا بايلانىستى ءبىز جوسپارلارىمىزدى وزگەرتتىك. جىل باسىندا جوسپارلار بولدى، ءبىراق ءقازىر باس سانيتار دارىگەردىڭ تالاپتارىن ەسكەرە وتىرىپ، بارلىق ءىس-شارالار ونلاين فورماتقا كوشۋدە. ال كوشەدە الەۋمەتتىك قاشىقتىق پەن سانيتارلىق تالاپتاردى ەسكەرە وتىرىپ جۇرگىزىلەتىن بولادى، – دەدى اكىم ونلاين-بريفينگتە جۋرناليستەر سۇراقتارىنا جاۋاپ بەرە وتىرىپ.
ونىڭ ايتۋىنشا، ەلوردا كۇنىن الەۋمەتتىك باعىتتا وتكىزۋ جوسپارلانعان. بۇل كۇنى كەزەكتە تۇرعاندارعا 400 پاتەر بەرىلەدى، ۇلەسكەرلەرگە 20-عا جۋىق كوپپاتەرلى تۇرعىن ءۇي پايدالانۋعا بەرۋ جوسپارلانۋدا، سونداي-اق 50-دەن استام اباتتاندىرىلعان اۋلا پايدالانۋعا بەرىلەدى. قالا باسشىسى اتاپ وتكەندەي، ەلوردادا زاعيپ بالالارعا ارنالعان بالاباقشا اشىلادى.
سونداي-اق ول قالا كۇنىنە وراي ەشقانداي وتشاشۋ جوسپارلانباعانىن اتاپ ءوتتى.
پىكىر قالدىرۋ