قازاقستاندا وتباسىلىق تۇرمىستا جاسالعان قىلمىستاردىڭ سانى 37 پايىزعا ارتىپ، بالالار ءسۋيسيدى وسكەن. بۇل تۋرالى ىشكى ىستەر ءمينيسترى ەرلان تۇرعىمبايەۆ tengrinews.kz سايتىنا بەرگەن سۇحبات بارىسىندا ايتتى.
– ايەلدەر مەن بالالار زورلىق-زومبىلىققا ۇشىراعان حالىقتىڭ ءالسىز بولىگىنە اينالىپ وتىر. بالالارعا زورلىق-زومبىلىق كورسەتەتىندەردىڭ 20 پايىزى ءوز اكەلەرى مەن وگەي اكەلەر. قالعان 80 پايىزى تۋىستارىنىڭ زورلىعىنا ۇشىرايدى. قوعامدا بالالار قورعالۋدىڭ ورنىنا كەرىسىنشە زورلىق-زومبىلىق قۇربانى بولۋدا، – دەدى مينيستر.
تۇرعىمبايەۆ ماسەلەنى شەشۋ ءۇشىن قوسىمشا ماماندار جۇمىلدىرىلعانىن ايتتى.
– رەفورما اياسىندا وسى ماسەلەنى شەشۋ ءۇشىن ءبىرقاتار لاۋازىمداردى بەكىتتىك. ءبىرىنشى كەزەڭدە كامەلەتكە تولماعانداردىڭ ىستەرى جونىندەگى 448 ينسپەكتوردى قىزمەتكە الدىق. ولار ءقازىر بەكىتىلگەن اۋماقتاردا جۇمىس ىستەپ جاتىر. سونداي-اق ايەلدەرگە زورلىق-زومبىلىققا قارسى ءىس-قيمىل بولىمشەلەرى بويىنشا 129 مامان بار، – دەدى ەرلان تۇرعىمبايەۆ.
ءمينيستردىڭ سوزىنشە، ايەلدەر كوبىنە كۇيەۋلەرىنە ارىزدانىپ، ەكىنشى كۇنى ارىزىن قايتارىپ الادى. وعان كۇيەۋى وتباسىنىڭ جالعىز اسىراۋشىسى بولۋى، سوندىقتان "تۇرمەدە وتىرعاننان گورى وسىلاي جۇرە بەرسىن" دەپ ويلاۋى سەبەپ.
– بۇل ارينە وتباسىنىڭ ىشكى ماسەلەسى. ءبىراق بالالاردى قورعاۋ كەرەك. اتا-انالاردىڭ جاۋاپكەرشىلىگى بولۋى كەرەك. ويتكەنى بالالارعا كوبىنە اتا-انالارى قورلىق كورسەتەدى جانە جاۋاپكەرشىلىكتەن قاشۋعا تىرىساتىن جاعدايلار كوپ كەزدەسەدى، – دەدى مينيستر.
پىكىر قالدىرۋ