جوعارى وقۋ ورىندارىنىڭ جاس پەداگوگ-تۇلەكتەرىن ۇلتتىق بىلىكتىلىك تەستىلەۋىن تاپسىرعاننان كەيىن عانا جۇمىسقا قابىلداۋ جوسپارلانىپ وتىر. بۇل تۋرالى مەكتەپكە دەيىنگى جانە ورتا ءبىلىم كوميتەتىنىڭ ءتورايىمى مايرا مەلدەبەكوۆا ءمالىم ەتتى.
– مۇنداي جاڭاشىلدىق بىلىكتى پەداگوگتەر بالالارىمىزعا ساپالى ءبىلىم بەرۋلەرى ءۇشىن ەنگىزىلىپ وتىر. بيىل وقۋىن ءتامامداعان جوعارى وقۋ ورىندارىنىڭ تۇلەكتەرى مەن وسى ۋاقىتقا دەيىن مەكتەپتە جۇمىس ىستەمەگەن پەداگوگتەر ۇلتتىق بىلىكتىلىك تەستىلەۋىن تاپسىرۋى ءتيىس. تەستىلەۋدى تاپسىرىپ، قاجەتتى بالل جيناعان تۇلەكتەردى عانا جۇمىسقا قابىلداۋ جوسپارلانىپ وتىر. ۇلتتىق بىلىكتىلىك تەستىلەۋىندە بىلىكتىلىگىن دالەلدەگەننەن كەيىن تۇلەكتەر ءوز كاسىبي داعدىلارىن مەكتەپ قابىرعاسىندا كورسەتە الادى. بۇل جاڭاشىلدىق وقۋىن اياقتاپ، پەداگوگ بولىپ جۇمىس ىستەۋگە نيەت بىلدىرگەن تۇلعالارعا عانا قاتىستى. ياعني، جۇمىس ىستەپ جۇرگەن مۇعالىمدەرگە بۇل تالاپتار قويىلمايدى، – دەدى بعم مەكتەپكە دەيىنگى جانە ورتا ءبىلىم كوميتەتىنىڭ ءتورايىمى مايرا مەلدەبەكوۆا.
قازاقستاندىق جوعارى وقۋ ورىندارىنا جاڭاشىلدىقتىڭ قاجەتتىلىگى تۋرالى تۇلەكتەر اراسىندا ءاقپاراتتىق-تۇسىندىرۋ جۇمىستارىن جۇرگىزۋ تاپسىرىلعان. ۇلتتىق بىلىكتىلىك تەستىلەۋى باستالدى. تەستىلەۋدى تاپسىرۋ ءۇشىن ۇلتتىق تەستىلەۋ ورتالىعىنىڭ سايتىندا الدىن الا تىركەلۋ قاجەت.
2020 جىلدان باستاپ جوعارى وقۋ ورىندارىنا پەداگوگيكالىق ماماندىقتار بويىنشا تۇسۋگە نيەت بىلدىرگەن تۇلەكتەرگە قويىلاتىن تالاپتار كۇشەيتىلگەن. بۇرىن ۇبت-دا بولاشاق پەداگوگتەر ءۇشىن شەكتى بالل 50 بولسا، ەندى شەكتى بالل 75-كە دەيىن كوتەرىلدى. شاكىرتاقى كولەمى دە 26 مىڭنان 42 مىڭ تەڭگەگە دەيىن ۇلعايتىلدى. وسى جىلدىڭ قىركۇيەك ايىنان باستاپ ەلدەگى بارلىق ستۋدەنتتىڭ شاكىرتاقىسى 20%-عا ءوستى.
پىكىر قالدىرۋ