دەنساۋلىق ساقتاۋ مينيسترلىگى كوروناۆيرۋستىڭ "دەلتا" شتاممىنىڭ تارالۋىنا بايلانىستى ناۋقاستاردان الىنعان وڭ زەرتحانالىق ۇلگىلەرگە پتر-سكرينينگ جاسادى. ناتيجەسىندە "ءۇندى" شتاممى قازاقستاننىڭ بارلىق وبلىستارى مەن نۇر-سۇلتان، الماتى، شىمكەنت قالالارىندا تابىلعان. بۇل تۋرالى كوروناۆيرۋستىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا حابارلادى.
2021 جىلدىڭ 1 شىلدەسىنە "ءۇندى" شتاممىن انىقتاۋ ءۇشىن 414 سىنامانىڭ پتر سكرينينگى وتكىزىلگەن. ناتيجەلەرى بويىنشا 48،3 پايىز "ءۇندى" شتاممى بارلىق وبلىستار مەن نۇر-سۇلتان، الماتى، شىمكەنت قالالارىندا تابىلعان.
الايدا مۋتاسيانىڭ بار-جوعىن جانە ونىڭ "دەلتا" شتاممىنا جاتاتىنىن تۇپكىلىكتى راستاۋ ءۇشىن دنق -ۇلگىلەرىنىڭ ناتيجەسىن كۇتۋ كەرەك.
"دەلتا شتامىنىڭ ەرەكشەلىكتەرى – ينكۋباسيالىق كەزەڭنىڭ 5 كۇنگە دەيىن قىسقارۋى، ىشەك بەلگىلەرى باسىم، اۋرۋدىڭ تەز دامۋى، جاس ناۋقاستار سانىنىڭ كوبەيۋى، بالالار مەن جۇكتى ايەلدەرگە اناعۇرلىم اۋىر سوعۋى مۇمكىن" دەلىنگەن حابارلامادا.
ماماندار ينفەكسيادان قورعانۋدىڭ جالعىز جولى ۆاكسينالاۋ ەكەنىن ايتتى. سونىمەن ماسكا الەۋمەتتىك قاشىقتىق، قول گيگيەناسى، ءۇي-جايلاردى جەلدەتۋ جانە تاعى باسقا سىندى قاراپايىم ساقتىق شارالارىن ۇستانۋدى ەسكەرتتى.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنە سايكەس، 1 شىلدەدەگى جاعداي بويىنشا "دەلتا" SARS-CoV-2 شتاممى الەمنىڭ 96 ەلىندە انىقتالعان.
پىكىر قالدىرۋ