لوندون وليمپياداسىنىڭ چەمپيونى ولگا رىپاكوۆا مەن بوكستان ۇلتتىق قۇراما كاپيتانى، الەم چەمپيوناتىنىڭ ەكى دۇركىن جۇلدەگەرى قامشىبەك قوڭقابايەۆ توكيودا قازاقستان وليمپيادا قۇراماسىنىڭ تۋ ۇستاۋشىلارى رەتىندە تاڭدالدى. بۇل تۋرالى ۇلتتىق وليمپيادالىق كوميتەتى جاريالادى.

تۋ ۇستاۋشىلاردى قازاقستان ۇلتتىق وليمپيادالىق كوميتەتى اتلەتتەر كوميسسياسى ۇسىنعان.

– تاريحي توكيو وليمپياداسىنىڭ باستالۋىنا ءبىر ايدان از ۋاقىت قالدى. ساعىنا كۇتكەن وليمپيادا ويىندارى وتەدى جانە دە وعان قازاقستان ماقتانىشپەن ءوزىنىڭ ەڭ ۇزدىك سپورتشىلارىن اتتاندىرادى. ەڭ لايىقتىلارى ىرىكتەلىندى. مەن ولگا رىپاكوۆانىڭ وليمپيادانىڭ اشىلۋ سالتاناتىندا قازاقستان تۋىن الىپ شىعاتىنىنا قۋانىشتىمىن. سەبەبى، ولگانىڭ ارقاسىندا كوك بايراعىمىز وليمپيادا كوگىندە ءبىر ەمەس، بىرنەشە رەت جەلبىرەدى. قامشىبەك قوڭقابايەۆ – قازاقستاندىق سپورتتىڭ كۇشى مەن شەبەرلىگىنىڭ ۇلگىسى، وليمپيادا شارشى الاڭىندا زور جاۋاپكەرشىلىككە يە بولعان بوكس قۇراماسىنىڭ كاپيتانى. ەكى سپورتشى دا قاتارلاستارىنىڭ الدى، قۇرامانىڭ كوشباسشىلارى جانە جاس بۋىنعا ۇلگى. قوس اتلەتكە جانە بارلىق وليمپيادالىق قۇرامعا ساتتىدىك تىلەيمىن، – دەدى قازاقستان ۇوك باسشىسى تيمۋر قۇلىبايەۆ.

ولگا رىپاكوۆا ءۇشىن توكيوداعى وليمپيادا ونىڭ سپورت مانسابىنداعى ءتورتىنشى وليمپيادا بولماق. ول ءۇش قارعىپ سەكىرۋ بويىنشا 2008 جىلى بەيجىڭ وليمپياداسىندا كۇمىس، 2012 جىلى لوندوندا التىن جانە 2016 جىلى ريودا قولا مەدال جەڭىپ العان.

بۇدان بولەك، ولگانىڭ ەنشىسىندە ۋنيۆەرسيادادا التىنى جانە ازيا ويىندارىنىڭ التى التىن مەدالى بار. سونداي-اق ول الەم چەمپيونى جانە 2010 جىلعى قۇرلىقتىق كۋبوگتىڭ يەگەرى.

قامشىبەك قوڭقابايەۆ بوكستان قازاقستان ەرلەر ۇلتتىق قۇراماسىنىڭ كاپيتانى. ول 2014 جىلعى اسكەريلەر اراسىندا الەم چەمپيونى، ازيا چەمپيوناتىنىڭ ەكى دۇركىن جانە 2017 مەن 2019 جىلعى الەم چەمپيوناتتارىنىڭ كۇمىس جۇلدەگەرى. توكيو وليمپياداسى 29 جاستاعى قىزىلوردالىق سپورتشى ءۇشىن العاشقى وليمپيادا ويىندارى بولماق.

وليمپيادا ويىندارىنىڭ اشىلۋ سالتاناتى 23 شىلدەدى توكيو وليمپيادا ستاديونىندا وتەدى. وليمپيادالىق كوماندا توكيوعا جىبەرىلگەنگە دەيىن جاتتىعۋ بازالارىندا كەم دەگەندە ەكى اپتا كارانتيندە بولادى. كوماندا جاپونياعا 16 شىلدەدە اتتانادى. قاۋىپسىزدىك پەن دەنساۋلىقتى قورعاۋدى قامتاماسىز ەتۋ ءۇشىن دەلەگاسيانىڭ رەيستەرى "Air Astana" اۋەكومپانياسىنىڭ چارتەرلىك رەيستەرىمەن جۇزەگە اسىرىلادى.

قازاقستاندىق سپورتشىلار توكيودا وتەتىن جازعى وليمپيادا ويىندارىنا سپورتتىڭ 27 تۇرىنەن 96 جولداما جەڭىپ العان. تءورتجىلدىقتىڭ باستى دوداسىندا بارلىعى 339 مەدال جيىنتىعى ساراپقا سالىنادى.