شىمكەنتتە  348 ءمۇعالىم  ءوز ساناتىن جوعارلاتۋ ءۇشىن  جالعان سەرتيفيكات ساتىپ الىپ، مەملەكەتتەن تولەنەتىن ۇستەماقى الىپ كەلگەنى انىقتالدى. بۇل تۋرالى otyrar.kz سايتى حابارلادى. 

سايت مالىمەتىنشە، تەكسەرىس ناتيجەسىندە كوپتەگەن پەداگوگتىڭ اتتەستاسيادان وتپەگەنى، ءتىپتى تەستىلەۋ ورتالىعىنا كەلمەگەنى، قۇجاتتى ساتىپ العانى انىقتالعان. ال قالا مەكتەپتەرىنىڭ بىرىندە ديرەكتور بولعان پەداگوگ وسى ىسكە قاتىسى بار كۇدىكتىلەردىڭ ءبىرى بولىپ وتىر. مۇعالىمدەردىڭ 80 پايىزى ەكى جىل ىشىندە العان ۇستەماقىلارىن بيۋدجەتكە قايتارىپ ۇلگەرگەن. 

– 2018-2019 جىلدارى شىمكەنت قالاسىنىڭ 348 پەداگوگى وسىنداي جالعان اقپاراتقا يە بولىپ، ۇلتتىق بىلىكتىلىك تەست تاپسىرماي-اق نەمەسە ودان قۇلاپ قالسا دا، ارنايى وسى تەستىلەۋدەن ءوتتى دەگەن جالعان قۇجاتتارىمەن وسىنداي ساناتتارعا يە بولعان. سولاي وكىمەتكە 194 399 000 تەڭگە قارجىعا زيان كەلتىرگەن. شىمكەنت قالالىق ءبىلىم باسقارماسىنىڭ باس مامانى دوسجانوۆ قاسىمحان جانە سول كەزدەگى 79 مەكتەپتىڭ ديرەكتورى، وقۋ ءىسىنىڭ مەڭگەرۋشىسى بولعان قارابايەۆا اينۇر دەگەن ازاماتشالار كۇدىكتى دەپ تانىلدى. ءال-فارابي اۋدانىندا سوت پروسەستەرى جۇرۋدە، – دەدى شىمكەنت قالالىق ءبىلىم باسقارماسىنىڭ باسشىسى جانات تاجييەۆا.  

قالانىڭ باس ۇستازى جالعان كۋالىك الىپ، باسى داۋعا قالعان مۇعالىمدەر ەندى بىلىكتىلىكتەرىن قايتا دالەلدەۋى ءۇشىن سىناقتان ءوتۋى مۇمكىن ەكەنىن، ءبارى سوت شەشىمىنە بايلانىستى ەكەنىن ايتتى.